«Արմավիր» ՔԿՀ–ից՝ հիմնարկում բունտի վերաբերյալ լուրերի մասին

ՀՀ ԱՆ «Արմավիր» քրեակատարողական հիմնարկում անհնազանդության ակցիաներ չկան։ Այս մասին Sputnik Արմենիային հայտնեցին քրեակատարողական ծառայությունից։

Ավելի վաղ լուր էր տարածվել, որ Հակակոռուպցիոն կոմիտեն ձերբակալել է «Արմավիր» ՔԿՀ–ի «Քրեակատարողական բժշկության կենտրոն» ՊՈԱԿ ստորաբաժանման ղեկավար Գևորգ Գեժոյանին։ Նշվում էր նաև, որ այդ ստորաբաժանման դատապարտյալներն ու կալանավորները բունտ են անում, փորձում են կոտրել դռները։

«Վերոնշյալ հրապարակման կապակցությամբ հայտնում ենք, որ ՀՀ ԱՆ «Արմավիր» քրեակատարողական հիմնարկում անհնազանդության ակցիաներ չկան, աշխատանքներն ընթանում են բնականոն հունով»,– նշեցին քրեակատարողական ծառայությունից։

Հակակոռուպցիոն կոմիտեից դեռևս չի հաջողվում մեկնաբանություն ստանալ։