Փետրվարի 1–ից առանց պայմանագրի կամ հայտարարության գույք վարձով տվողները կտուգանվեն
ՊԵԿ–ը փետրվարից սկսելու է վարչարարություն այն սեփականատերերի նկատմամբ, ովքեր չունեն վարձակալության պայմանագիր կամ հայտարարություն վարձակալական հարաբերությունների վերաբերյալ։ Այս մասին մամուլի ասուլիսի ընթացքում հայտնեց ՊԵԿ նախագահ Ռուստամ Բադասյանը։
Նա հիշեցրեց, որ այլընտրանքային հնարավորություն է տրվել բոլոր սեփականատերերին` եթե ինչ–ինչ պատճառներով չեն կարող վարձակալության պայմանագիր կնքել, կարող են կոմիտեին ներկայացնել հայտարարություն, որ ունեն փաստացի վարձակալական հարաբերություններ և հաջորդ տարի ներկայացնեն տարեկան եկամուտների հայտարարագիրն ու վճարեն հարկերը։
«Մանավանդ դա կիրառելի է այն դեպքերում, երբ օրավարձով կամ ժամավճարով է վարձակալությունը։ Պարզ է` երկու–երեք օրը մեկ չեն կարող գալ կադաստր, գրանցում անել»,–հավելեց Բադասյանը։
Նրանց այդ առաջարկին արձագանքել է արդեն 5000 քաղաքացի։ ՊԵԿ–ը մինչև փետրվարի 1–ը կսպասի, մինչև կարձագանքեն այլ սեփականատերեր ևս, այնուհետև սկսի իր ստուգումները։
«Մինչև փետրվարի մեկը հավաքելու ենք բոլոր հայտարարությունները։ Ունենք տեղեկություններ, որոնք ստանում ենք որոշ այլ պետական մարմիններից, ունենք մեր սեփական տեղեկությունը` որտեղ, ինչ տարածք է վարձով տրվում, և փետրվարից փուլ–փուլ կսկսենք վարչարարությունը` կենտրոնանալով նորակառույց շենքերում տրվող բնակարանների վարձակալության վրա»,–մանրամասնեց նա։
ՊԵԿ նախագահը կոչ արեց քաղաքացիներին կամավոր ներկայացնել հայտարարություններ, որպեսզի խուսափեն լրացուցիչ վարչարարությունից և մեծ տուգանքներից։
