Այս հայտարարությունն իրականությունը խեղաթյուրելու և Ադրբեջանի ներքին գործերին միջամտելու փորձ է․ Հաջիզադե

Ֆրանսիական կողմը հրաժարվել է որևէ բացատրություն տալ և համագործակցել հետաքննության հարցում: Այս մասին հայտարարել է Ադրբեջանի արտաքին գործերի նախարարության մամուլի քարտուղար Այհան Հաջիզադեն՝ պատասխանելով Ֆրանսիայի քաղաքացու ձերբակալման կապակցությամբ Ֆրանսիայի Եվրոպայի և արտաքին գործերի նախարարության հայտարարության վերաբերյալ տեղական մամուլի հարցին: Տեղեկությունը փոխանցում են ադրբեջանական լրատվամիջոները։

«Բացի այդ, չնայած Ադրբեջանի արտաքին գործերի նախարարությունը բանավոր նոտա է հղել Ադրբեջանում Ֆրանսիայի դեսպանատանը՝ Ֆրանսիայի դեսպանատան երկու աշխատակիցների հետ նշված անձի համագործակցության հարցը ուսումնասիրելու նպատակով, Ֆրանսիական կողմը հրաժարվել է որևէ բացատրություն տալ և համագործակցել հետաքննության հարցում: Այդ կապակցությամբ դեսպանատան այդ երկու աշխատակիցներն Ադրբեջանի կողմից հայտարարվել են անցանկալի անձինք»,- ասվում է Ադրբեջանի ԱԳՆ հայտարարության մեջ:

Ադրբեջանի դիվանագիտական գերատեսչության խոսնակը պատասխանել է Փարիզի քննադատությանը, թե Ֆրանսիայի կառավարությունը, մասնավորապես, պնդել է, որ Ադրբեջանում լրտեսության մեղադրանքով Ֆրանսիայի քաղաքացի Մարտին Ռայանի կալանքը «կամայական» է։

«Այս անհիմն հայտարարությունն իրականությունը խեղաթյուրելու և Ադրբեջանի ներքին գործերին միջամտելու ևս մեկ փորձ է»,- հայտարարել է Հաջիզադեն։