ՏԵՍԱՆՅՈՒԹ. Ռուսաստանում ՀՀ քաղաքացին ավտոկայանատեղիում սպանել է հայրենակցին. մանրամասներ
Մոսկվայի մարզի ոստիկանները փնտրում են ՀՀ 29-ամյա քաղաքացուն, որը Նիգինսկ քաղաքի ավտոկայանատեղիում սպանել է իր 44-ամյա հայրենակցին։ Նա կրակել է տղամարդու վրա և անհետացել անհայտ ուղղությամբ։
Ինչպես հայտնի է դարձել mk.ru-ին, դեպքը տեղի է ունեցել հունվարի 7-ի երեկոյան Նոգինսկի Տրուդովայա փողոցում գտնվող առևտրի կենտրոնի մոտ։ Տեսախցիկների տեսագրությունների շնորհիվ քննիչները կարողացել են վերականգնել իրադարձությունների ժամանակագրությունը:
44-ամյա Արմենը (բոլոր անունները փոխված են) և նրա բարեկամուհին ժամանել են ռեստորան, որտեղ կոնֆլիկտ են ունեցել տարեց այցելուի հետ, որին ուղեկցել է 29-ամյա որդին՝ Գեորգը։
Նշվում է, որ շուտով Արմենն ու նրա ուղեկիցը դուրս են եկել ռեստորանից, նստել են մեքենան՝ պատրաստվելով տուն գնալ։ Սակայն մի խումբ ագրեսիվ տղամարդիկ կտրել են նրանց ճանապարհը: Նրանք փորձել են Արմենին դուրս բերել մեքենայից, և երբ դա չի ստացվել, Գեորգը հինգ անգամ կրակել է տղամարդու վրա։ Չորս փամփուշտ դիպել է Արմենի ձախ ոտքին, մեկը՝ մեջքի ստորին հատվածին։ Հարձակվողները հետ են քաշվել նույնքան արագ, որքան հայտնվել են։
Կրակողը նստել է Porsche իր մակնիշի մեքենան և շարժվել անհայտ ուղղությամբ։ Տուժածը կարողացել է ինքնուրույն հասնել հիվանդանոց։ Նրան ուղեկցել է բարեկամուհին, որն ականատես է եղել հարձակմանը։ Այնուամենայնիվ, նա չի կարողացել բացատրել բժիշկներին, թե ինչ է պատահել: Իսկ մեկ ժամ չանցած՝ Արմենը մահացել է։
Հաղորդվում է նաև, որ կրակողի հարազատները չեն պարզաբանել, թե որն է եղել կոնֆլիկտի պատճառը, և որտեղ է այժմ թաքնվում մարդասպանը։ Սպանության կասկածյալը ձեռնարկատեր է՝ Նոգինսկում նրա անունով ռեստորան է գրանցված։
ՌԴ Քննչական կոմիտեի Մոսկվայի մարզի գլխավոր քննչական վարչության ղեկավարի ավագ օգնական Օլգա Վրադիյի խոսքով՝ սպանության դեպքի առթիվ քրեական գործ է հարուցվել։
