ՏԵՍԱՆՅՈՒԹ. Բելգորոդում բնակիչներին առաջարկել են տարհանվել
Ուկրաինայի հետ սահմանակից ռուսական Բելգորոդի իշխանությունները առաջարկել են բնակիչներին տարհանվել՝ ուկրաինական կողմի ինտենսիվ հրետակոծություններից հետո, որոնց հետևանքով անցած գիշեր երեք մարդ է վիրավորվել։ Տեղի դպրոցները որոշել են երկարաձգել ձմեռային արձակուրդները։
Նահանգապետ Վյաչեսլավ Գլադկովը հայտնել է, որ Բելգորոդի բնակիչները, ովքեր ցանկանում են տարհանվել հրետակոծության պատճառով, պետք է տեղեկացնեն իշխանություններին, որից հետո կտեղափոխվեն Ստարի Օսկոլ և Գուբկին քաղաքներ:
Նա խոստացել է, որ տարհանվել ցանկացողները կլինեն «բավականին հարմարավետ պայմաններում, տաք և ապահով սենյակներում»։
«Դուք այնտեղ կմնաք այնքան ժամանակ, որքան անհրաժեշտ կլինի»,- վստահեցրել է Գլադկովը։
Զուգահեռ Կիևը հարվածներ է հասցրել Ղրիմի ուղղությամբ, որոնց նպատակն է վերադարձնել 10 տարի առաջ բռնակցված թերակղզին։ Ուկրաինական զինուժը հայտարարում է, թե վերջին ռազմական գործողությունները հաջող են ընթացել, Ղրիմում խոցվել է առնվազն մեկ ռուսական հրամանատարական կետ։ Ռուսական կողմն իր հերթին ակտիվացրել է հարվածները՝ թիրախավորելով ուկրաինական բնակավայրերն ու ենթակառուցվածքները։
Հաղորդվում է, որ Բելգորոդի մարզի Շեբեկինոյում օդային տագնապի ազդանշաններ են հնչում:
