ՏԵՍԱՆՅՈՒԹ․ Հարգելի տատիկ, դուք ազատված եք աշխատանքից․ Փաշինյանը՝ նոր նախագծի մասին
ՀՀ կառավարությունը կանոնակարգեց զոհված զինծառայողների ծնողների նորածին երեխաների խնամքը։ Որոշումն ընդունվեց ՀՀ կառավարության այսօրվա նիստի ժամանակ։
Աշխատանքի և սոցիալական հարցերի նախարար Նարեկ Մկրտչյանը հայտարարեց, որ 2022 թ. հունվարին հաստատվեց մի նախագիծ, համաձայն որի` մարտական գործողությունների ժամանակ հայրենիքի համար իրենց կյանքը զոհված զինծառայողների ծնողները հնարավորություն ստացան վերարտադրողական բուժօգնության և փոխնակ մոր ծառայության միջոցով երեխա ունենալ և արդեն տասնյակ ընտանիքներում ծնվել են երեխաներ։
ՀՀ առողջապահության նախարարի տեղակալ Լենա Նանուշյանն իր հերթին տեղեկացրեց, որ սկսած 2021 թ–ից զոհված զինծառայողների ընտանիքներում արդեն ծնվել է 54 երեխա, որից ծրագրի շրջանակում ծնվել է 32–ը։
ՀՀ վարչապետ Նիկոլ Փաշինյանը նախագծի հետ կապված դիտողություններ արեց։ Նրա համար անհասկանալի էր, որ դայակը ծրագրի շահառուի հետ նույն հասցեում չպետք է գրանցված լինի։ Նրա խոսքով` առնվազն այս դեպքում այդ բացառությունը պետք է անել, քանի որ ՀՀ կառավարության շահառուն, որին ցանկանում է աջակցել, երեխան է։
Վարչապետի խոսքով` ինչքան լավ պահեն այդ երեխային, այնքան բոլորիս համար լավ։
ՀՀ փոխվարչապետ Մհեր Գրիգորյանն առաջարկեց կարգավորումը փոխել ու սահմանել` եթե երկու ծնողն էլ ՊԵԿ–ով իդենտիֆիկացվում են, որ աշխատում են, ապա որևէ ֆիլտր չկիրառվի ու երեխայի դայակը լինի հարազատներից որևէ մեկը։
Բացատրությունը չբավարարեց Փաշինյանին, ու նա հայտարարեց, որ ՀՀ կառավարության որոշումները միայն զեկույցներում գրելու համար չեն, այլ որ մարդիկ կարողանան դրանից օգտվել, նրանց կյանքը բարելավվի։
«Այսպիսի կարգավորումներով մենք մեր նպատակներից շեղվում ենք։ Երբեմն շատ չենք խորանում նախագծերի մեջ ու ասում ենք` այ, տեսեք, մենք լավ կառավարություն ենք, այսպիսի որոշումներ ենք կայացրել, հետո գնում ենք մարզային հանդիպման, մարդկանց հարցնում ենք` օգտվո՞ւմ եք այս ծրագրից, ասում են` չէ, ասում ենք` ինչի՞, ասում են` հազար ու մի սահմանափակում եք դնում` մեր հարևանը, բարեկամը չի կարող դայակ լինել, մենք այդքան ներվ չունենք այդքան հարցերի լուծման հետևից գնալու։ Մենք մեր շահառուին չպետք է կորցնենք ու այդ ընկալումը, որ դայակը երեխայի տատիկն է, ուրեմն` ինչի՞ ենք իրեն փող տալիս, իր պարտականությունն է, որ իր թոռնիկին պահի։ Մայրիկներին էլ հավելյալ լծակ կտանք` եթե տատիկն իր պարտականությունը լավ չկատարի, ասի` հարգելի տատիկ, դուք ազատված եք աշխատանքից»,– կատակեց ՀՀ վարչապետը։
Այս որոշումն ուժի մեջ է մտնում 2024 թվականի հունվարի 1-ից։
Մանրամասները՝ տեսանյութում։
