Նրանք պարզապես վախկոտ են․ Լավրով

ԱՄՆ պետքարտուղար Էնթոնի Բլինկենի և եվրոպական դիվանագիտության ղեկավար Ժոզեպ Բորելի ժամանակից շուտ մեկնումը Մակեդոնիայի մայրաքաղաքից, որտեղ հանդիպել են Եվրոպայում անվտանգության և համագործակցության կազմակերպության (ԵԱՀԿ) երկրների արտաքին գործերի նախարարները, ցույց է տալիս երկխոսության հանդեպ նրանց վախը: Այս մասին հայտարարել է ՌԴ արտգործնախարար Սերգեյ Լավրովը՝ ԵԱՀԿ ԱԳ նախարարների նիստից հետո կայացած ասուլիսի ժամանակ։ Տեղեկությունը փոխանցում է ՌԻԱ Նովոստին։

«Բլինկենը, ինչպես հասկանում եմ, գնացել է, Բորելը` նույնպես։ Ինչո՞ւ է դա տեղի ունենում: Դե, նրանք հավանաբար կարծում են, որ դրանով ընդգծում են Ռուսաստանին մեկուսացնելու իրենց մտադրությունը։ Իսկ ես կարծում եմ, որ նրանք պարզապես վախկոտ են, վախենում են ցանկացած անկեղծ, փաստերով զրույցից, փախել է իմ գործընկերը` պետքարտուղար Բլինկենը, ես ոչ մի տեղ չեմ փախել»,- ասել է նա: 

Հիշեցնենք` ԵԱՀԿ արտաքին գործերի նախարարների խորհրդի նիստն անցկացվել է Հյուսիսային Մակեդոնիայի մայրաքաղաք Սկոպյեյում։