Փաշինյանն անդրադարձել է Ադրբեջանի հետ բանակցային գործընթացին
Արաբագետ մի երիտասարդ վարչապետ Նիկոլ Փաշինյանին անվտանգային ոլորտին վերաբերող հարց ուղղեց`հետաքրքրվելով, թե Ադրբեջանն ինչու է հրաժարվում նախօրոք համաձայնեցրած 3 սկզբունքների հիման վրա բանակցել Հայաստանի հետ, և արդյոք կարելի է ենթադրել, որ արցախահայությանը տեղահանելուց և Արցախին տիրանալուց հետո նոր պահանջներ է առաջ քաշում։
«Այս պահի դրությամբ դեռևս ակնհայտ ու պարզ չէ՝ Ադրբեջանն ի վերջո համաձայնում է, վերահաստատում է 3 սկզբունքների շուրջ խաղաղության պայմանագիր կնքել Հայաստանի հետ։ Հստակ չէ, չենք կարող վստահաբար պնդել, որ Ադրբեջանը հրաժարվում է այդ 3 սկզբունքների հիման վրա խաղաղության պայմանագիր կնքելուց, բայց նաև չենք կարող վստահ ասել, որ Ադրբեջանը վերահաստատում է իր հավատարմությունն այդ երեք սկզբունքներին։ Անհրաժեշտություն կա բանակցությունների ընթացքում այս հարցերն ու նրբությունները պարզաբանելու։ Առաջիկայում նման քննարկում` գոնե սահմանների ու քարտեզների մասով, նախատեսված է»,– պատասխանեց ՀՀ վարչապետը։
Հիշեցնենք՝ ՀՀ վարչապետ Նիկոլ Փաշինյանն ուղիղ եթերում պատասխանում է ՀՀ քաղաքացիների և սփյուռքի հայրենակիցների հարցերին: Քաղաքացիները շուրջ 500 հարց են ուղարկել ՀՀ վարչապետ Նիկոլ Փաշինյանին։ Նա հայտարարեց, որ այդքանին չի կարող պատասխանել, բայց կոնկրետ խնդիրներ պարունակող հարցերը կուղղորդվեն համապատասխան գերատեսչություններին։
