Ինչու կառավարության նիստի ժամանակ անջատվեց հոսանքը. «Փաստ»

«Փաստ» օրաթերթը գրում է. «Նախօրեին կառավարության նիստի ժամանակ տեղի ունեցավ էլեկտրաէներգիայի կարճաժամկետ անջատում, ինչը առիթ դարձավ, որ Նիկոլ Փաշինյանն իր զայրույթն արտահայտի: Նա մասնավորաբար նշել էր, թե «Հայաստանում հոսանքի հետ կապված խնդիր կա», նաև հավելել, որ իր աշխատասենյակում «լույսերն անընդհատ թարթում են»:

Հոսանքազրկման հետ կապված օրաթերթը կապ է հաստատել «Հայաստանի էլեկտրական ցանցեր» ընկերության հետ՝ հասկանալու անջատման պատճառը:

«Անջատումը պայմանավորված էր ոչ թե մեր, այլ բարձրավոլտ էլեկտրական ցանցերում առաջացած համակարգային խնդրով, որի հետևանքով հոսանքազրկվել էին մեր հանրապետության բազմաթիվ տարածքներ, այդ թվում՝ կառավարության շենքը:

Ուստի, ՀԷՑ-ի գործառույթների հետ որևէ կապ չուներ, հետևաբար նաև դուրս էր մեր ընկերության պատասխանատվության շրջանակից», - «Փաստ» թերթի հարցմանն ի պատասխան ասել է ՀԷՑ տեխնիկական տնօրեն Դավիթ Գրիգորյանը:

Առավել մանրամասն թերթի այսօրվա համարում։

Հիշեցնենք՝ ավելի վաղ հայտնել էինք, որ Կառավարության նիստի ընթացքում էլեկտրաէներգիան անջատվեց։