ՏԵՍԱՆՅՈՒԹ. Արգենտինայի նոր նախագահ է դարձել Խավիեր Միլեյը, ով խոստացել է այրել Կենտրոնական բանկը և վերջ դնել «գնաճի քաղցկեղին»
Ծայրահեղ աջ քաղաքական գործիչ Խավիեր Միլեյը, ով Արգենտինայի նախագահական ընտրությունների երկրորդ փուլի ֆավորիտ չէր համարվում, անսպասելիորեն հաղթել է՝ հավաքելով ձայների ավելի քան 56%-ը։ Այս մասին գրում է BBC–ի ռուսական ծառայությունը
Նրա մրցակիցը՝ էկոնոմիկայի նախարար Սերխիո Մասսան, ընդունել է պարտությունը և հաջողություն մաղթել նոր ղեկավարին։
«Ակնհայտ է, որ արդյունքներն այն չէին, ինչ ակնկալում էինք: Ես խոսել եմ Խավիեր Միլեյի հետ շնորհավորելու և հաջողություն մաղթելու համար, քանի որ նա այն նախագահն է, որին արգենտինացիների մեծամասնությունը ընտրել է առաջիկա չորս տարիների համար», - ասել է Մասսան:
Խավիեր Միլեյը հանդես է գալիս տնտեսության դոլարիզացիայի, սեփականաշնորհման և Ռուսաստանի, Չինաստանի և Բրազիլիայի հետ համագործակցությունից հրաժարվելու օգտին՝ հօգուտ ԱՄՆ-ի և Իսրայելի։
Գզգզված մազերով 53-ամյա TikTok աստղին, երաժիշտին, տնտեսագետին և հեռուստահաղորդավարին համեմատել են ԱՄՆ նախկին նախագահ Դոնալդ Թրամփի և Բրազիլիայի նախկին նախագահ Ժաիր Բոլսոնարոյի հետ՝ իր բուռն ոճի և հակասական հայտարարությունների պատճառով:
Նա, մասնավորապես, կոչ է արել «դեն նետել հիվանդ պեսոն հանուն ԱՄՆ դոլարի» և խոստացել է այրել Կենտրոնական բանկը՝ «գնաճի քաղցկեղին» վերջ տալու համար։
Ինչպես հիշեցնում է AFP-ն, Միլեյը դեմ է արտահայտվել հղիության արհեստական ընդհատմանը, հրազեն կրելուն, խոստացել է խզել հարաբերությունները Արգենտինայի հիմնական առևտրային գործընկերների՝ Չինաստանի և Բրազիլիայի հետ, ինչպես նաև կասկածի տակ է դրել ռազմական բռնապետության զոհերի թիվը: Նա հերքել է, որ կլիմայի փոփոխությունը պայմանավորված է մարդկային գործունեությամբ։
Միլեյը նույնպես դեմ է Արգենտինայի՝ ԲՐԻԿՍ մտնելուն։
Քաղաքական գործիչը մեղմացրեց իր հռետորաբանությունը երկրորդ փուլից առաջ՝ ավելի չափավոր ընտրողներ գրավելու համար, բայց քարոզարշավի սկզբում նա բեմ բարձրացավ միացված բենզասղոցով, որը խորհրդանշում էր արմատական փոփոխությունները, որոնք նա նախատեսում է իրականացնել տնտեսական խնդիրներ ունեցող երկրում:
Հրապարակված տեսակադրերում Արգենտինայի բնակիչները տոնում են Միլեյի հաղթանակը անցկացված նախագահական ընտրություններում:
