ՏԵՍԱՆՅՈՒԹ. Պաղեստինամետ հանրահավաքից առաջ Լոնդոնում բախումներ են տեղի ունեցել

Մեծ Բրիտանիայում աջակողմյան ակտիվիստների և ոստիկանության միջև բախումներ են տեղի ունեցել Լոնդոնի կենտրոնում՝ Կենոտաֆ պատերազմի հուշահամալիրի մոտ՝ hիշատակի օրը և Պաղեստինին աջակցող խոշոր ցույցից առաջ: Այս մասին հաղորդում է Sky News-ը:

«Բախումներ են տեղի ունեցել, երբ աջակողմյան ակտիվիստները փորձել են հասնել Լոնդոնի Կենոտաֆ», - ասվում է հեռուստաալիքի հաղորդագրության մեջ:

Սուրբ Գեորգի խաչով դրոշներով մարդկանց հոծ բազմությունը, ի պաշտպանություն Անգլիայի կարգախոսներ վանկարկելով, փորձել է հասնել կառավարական Ուայթհոլ փողոց, սակայն ոստիկանները փակել են նրանց ճանապարհը:

Դրանից հետո բախումներ են սկսվել, ակտիվիստները սկսել են շշեր նետել ոստիկանների ուղղությամբ՝ փորձելով ճեղքել բարիկադը, իսկ իրավապահները ստիպված են եղել մահակներ կիրառել:

Նշվում է, որ միջադեպը տեղի է ունեցել զոհվածների հիշատակի օրվա կապակցությամբ հակամարտությունների ժամանակ զոհված զինվորների հիշատակին նվիրված երկու րոպե լռության մեկնարկից անմիջապես առաջ, սակայն հիշատակի արարողության ժամանակ բոլորը լռել են։ Սրանից հետո ոստիկաններին հաջողվել է ցրել ամբոխը: