Բաքուն արձագանքել է Միրզոյանի հայտարարություններին

Մենք կտրականապես մերժում ենք 2023 թվականի նոյեմբերի 9-ին Հայաստանի Հանրապետության արտաքին գործերի նախարար Արարատ Միրզոյանի կողմից ՅՈՒՆԵՍԿՕ-ի Գլխավոր կոնֆերանսի 42-րդ նստաշրջանում ունեցած ելույթի ժամանակ Ադրբեջանին ուղղված «անհիմն» և «կեղծ մեղադրանքները»։ Այս մասին ադրբեջանական լրատվամիջոցների փոխանցմամբ, ասել է Ադրբեջանի արտգործնախարարության մամուլի քարտուղար Այխան Հաջիզադեն։ 

«Անթույլատրելի է, որ Ադրբեջանի դեմ գրեթե «30 տարվա ռազմական ագրեսիայի ընթացքում մարդկության դեմ զանգվածային սպանություններ և հանցագործություններ» իրականացրած Հայաստանը, կեղծավորաբար շարունակում է մեղադրել Ադրբեջանին հայերի էթնիկ զտումների մեջ, ովքեր կամավոր են գնացել Հայաստան»,- ասել է Հաջիզադեն։

Միրզոյանը երեկ միջազգային ամբիոնից շեշտել է՝ Ադրբեջանի կողմից Լեռնային Ղարաբաղի 10-ամսյա շրջափակումը, հումանիտար ճգնաժամը, լայնածավալ ռազմական հարձակումն ու խաղաղ բնակչության և ենթակառուցվածքների անխտրական թիրախավորումը հանգեցրել են Լեռնային Ղարաբաղի բնիկ ողջ հայ բնակչության բռնի տեղահանմանը և էթնիկ զտմանը: Ինչ վերաբերում է Լեռնային Ղարաբաղում մնացած մշակութային և կրոնական ժառանգությանը, ապա, նախարարի խոսքով` դրա պաշտպանությունը վանդալիզմից և թալանից շատ կարևոր է:

Ադրբեջանի արտգործնախարարության մամուլի քարտուղարը «անհիմն» է որակել Միրզոյանի այս հայտարարությունը՝  նշել է․ «Ադրբեջանի «ինքնիշխան տարածքներում» գտնվող պատմական և կրոնական հուշարձանները հանդիսանում են Ադրբեջանի ազգային մշակութային ժառանգությունը և պաշտպանված են՝ անկախ իրենց ծագումից, աշխարհիկ կամ կրոնական պատկանելությունից»։