Անձը մահակով ներխուժել է Աբովյանի ղեկավարի առանձնատուն․ ինչ է հայտնի
Գիշերը անհայտ անձը, ենթադրաբար թմրանյութի ազդեցության տակ, մահակը ձեռքին փորձել է ներխուժել Աբովյան խոշորացված համայնքի ղեկավար, ԲՀԿ առաջնորդ Գագիկ Ծառուկյանի թիկնազորի նախկին պետ Էդուարդ Բաբայանի առանձնատուն։ Տանը եղել են Բաբայանի մայրը, կինն ու դուստրերը։ Այս մասին գրում է «Հրապարակ»-ը։
Լրատվամիջոցի հետ զրույցում Աբովյանի համայնքապետի պաշտպան Էմին Խաչատրյանն ասել է, որ Բաբայանի համար անծանոթ անձը մուտք է գործել առանձնատան բակ, ապա խուլիգանական գործողություններ կատարելով փորձել է ներխուժել տուն։
«Էդուարդ Բաբայանը ձայների հետքերով դուրս է եկել առանձնատնից, դռան առջև հանդիպելով իր համար անհայտ անձնավորությանը՝ կանխել է վերջինիս խուլիգանական գործողություններն ու ապօրինի մուտքն իր առանձնատուն։ Ի դեպ այդ անձը կարողացել է անցնել մինչեւ առանձնատան երկու պարիսպները»,-պատմել է Խաչատրյանը։
Նշվում է, որ փաստաբանին դեռ հայտնի չէ, թե ինչ մղումներով է փորձել այդ անձը ներխուժել Աբովյանի համայնքապետի տուն։
Խաչատրյանի խոսքով՝ Բաբայանի առանձնատուն ներխուժելու փորձ կատարած անձի ոչ ադեկվատ պահվածքը, խուլիգանական գործողությունները և բնակարանի անձեռնմխելիության խաթարման փորձը կասկածի տեղիք են տալիս առ այն, որ վերջինս եղել է թմրանյութի ազդեցության տակ։
Հաղորդվում է նաև, որ Բաբայանը կանխերլ է վերջինիս մուտքն իր առանձնատուն և պաշտպանել իր ընտանիքին։
