Կոմիտեին օժտել Ադրբեջանի հետ բանակցելու իրավազորությամբ․ Բաբայանի կուսակցությունը հայտարարություն է տարածել
Արցախի պաշտպանության նախկին նախարար Սամվել Բաբայանի ղեկավարած «Միասնական հայրենիք» կուսակցությունը հայտարարություն է տարածել Արցախի շուրջ իրավիճակի վերաբերյալ։
Հայտարարության մեջ նշվում է, որ Արցախի պետականությունը փոշիացվեց, այնինչ, եթե ոչ ինքնիշխան, ապա հայկական Արցախը ոչ միայն կայուն նախադրյալներ, այլև հեռանկար ուներ։
Կուսակցությունը ձևակերպել և Արցախի խորհրդարանին է փոխանցել օրակարգ, ըստ որի առաջարկվում է խորհրդակցություն հրավիրել Ազգային ժողովի պատգամավորների և հասարակական-քաղաքական առաջնորդների մասնակցությամբ, Լեռնային Ղարաբաղը լուծարելու վերաբերյալ Արցախի նախագահ Սամվել Շահրամանյանի հրամանագրի սահմանադրականության հարցով ԱԺ անունից դիմել ԼՂ Գերագույն դատարան, ձևավորել արցախցիների հիմնախնդիրներով զբաղվող հատուկ ծրագրերի կոմիտե և կոմիտեին օժտել միջազգային հանրության և Ադրբեջանի հետ բանակցելու իրավազորությամբ։
Խորհրդարանականները, սակայն, չեն համաձայնել մասնակցել վերոնշյալ օրակարգով խորհրդակցության, որի պատճառները չեն նշվում։
««Միասնական հայրենիք» կուսակցության դիրքորոշումն անփոփոխ է․ եթե կառավարություն, ապա բացառապես Արցախում, իսկ Արցախից դուրս՝ ժողովրդի կողմից ընտրված Ազգային ժողովի, տեղական ինքնակառավարման մարմինների և հասարակական կազմակերպությունների կողմից ընտրված մարմին՝ Արցախի ժողովրդի վերադարձի կամ վերաբնակեցման հարցերով զբաղվելու գործառույթով»,- նշվում է հայտարարության մեջ։
