ՏԵՍԱՆՅՈՒԹ․ Օդանավակայանը չի լուսավորվել, պաշտոնյաներ չեն եղել․ Բլինքենի ժամանումն Անկարա

Անկարայում ԱՄՆ պետքարտուղար Էնթոնի Բլինքենին դիմավորողների թվում բարձրաստիճան պաշտոնյաներ չեն եղել: Հատկանշական է նաև, որ օդանավակայանը չի լուսավորվել։  Այս մասին գրում են թուրքական լրատվամիջոցները։  

Սոցցանցերի օգտատերերն ուշադրություն են դարձրել այն հանգամանքին, որ օդանավակայանում ԱՄՆ դեսպան Ջեֆրի Ֆլեյքը դիմավորել է Բլինքենին՝ ձեռքը գրպանում։  Օգտատերերից ոմանք կարծում են, որ ամերիկացի քաղաքական գործիչը ստացել է այն, ինչին արժանի է։ 

Լրագրողները հայտնում են, որ մթության մեջ իրեն սպասող մարդկանց ողջունելով՝ Բլինքենը նստել է իր մեքենան։

Ավելի վաղ ԱՄՆ պետքարտուղարը եղել է Իրաքի մայրաքաղաք Բաղդադում։ Այնտեղ նա հայտարարել է, որ ամերիկացի և իսրայելցի պաշտոնյաները խորհրդակցություններ են անցկացնում գործնական հարցերի շուրջ, որոնք վերաբերում են Գազայի հատվածում ռազմական գործողությունների ընթացքում հումանիտար դադարների հնարավոր ապահովմանը:

Թուրքիայի նախագահ Ռեջեփ Թայիփ Էրդողանը քննադատել էր Բլինքենին պաղեստինա-իսրայելական հակամարտության սրացման նկատմամբ նրա սուբյեկտիվ մոտեցման համար: Թուրքիայի ղեկավարի խոսքով` ԱՄՆ պետքարտուղարը ճգնաժամին մոտենում է իր ազգային պատկանելությունից ելնելով։

Այսօր Թուրքիայի արտգործնախարար Հաքան Ֆիդանը և Բլինքենը բանակցություններ կանցկացնեն Գազայում տիրող իրավիճակի շուրջ: