Պեսկովը՝ հակամարտության փակուղի մտնելու մասին

Կրեմլում չեն համաձայնել Ուկրաինայի Զինված ուժերի գլխավոր հրամանատար Վալերի Զալուժնիի այն խոսքերի հետ, թե երկրի շուրջ հակամարտությունը փակուղի է մտել: Կիեւի զորահրամանատարն ավելի վաղ այդ մասին նշել էր այն համատեքստում, որ ուկրաինական զորքերը չեն կարողանա բեկման հասնել ռազմաճակատում: Այս մասին լրագրողների հետ զրույցում հայտնել է Ռուսաստանի նախագահի մամուլի քարտուղար Դմիտրի Պեսկովը։ Տեղեկությունը փոխանցում է ՏԱՍՍ-ը։ 

«Ոչ, այն փակուղի չի մտել։ Ռուսաստանը հետևողականորեն շարունակում է հատուկ ռազմական գործողության իրականացումը։  Բոլոր նպատակները, որոնք դրվել են, պետք է կատարվեն»,- լրագրողներին ասել է Պեսկովը։

Ըստ Պեսկովի՝ Ուկրաինան վաղուց պետք է հասկանա, որ անհեթեթ է անգամ խոսել մարտի դաշտում իր հաղթանակի հնարավորության մասին։

«Կիևի ռեժիմին վաղուց պետք էր հասկանալ, որ նույնիսկ խոսել մարտի դաշտում Կիևի ռեժիմի հաղթանակի ինչ-որ հեռանկարների մասին անհեթեթություն է։  Եվ որքան շուտ Կիևի ռեժիմն իր համար դա հասկանա, այնքան շուտ ինչ-որ հեռանկարներ կբացվեն»,- ասել է նա։