Օտարերկրացիների առաջին խմբին թույլ են տվել Գազայի հատվածից մեկնել Եգիպտոս։ Այս մասին հայտնում է РИА Новости-ն՝ հղում անելով Agence France-Presse-ին (AFP):

«Օտարերկրացիների առաջին խումբը Գազայից Եգիպտոս կմեկնի չորեքշաբթի»,- լրագրողներին ասել է եգիպտացի մի պաշտոնյա, որի անունը չի նշվում:

Նախնական տեղեկություններով՝ օտարերկրյա քաղաքացիների հեռանալը համաձայնեցրել են Իսրայելը, Եգիպտոսը և պաղեստինյան ՀԱՄԱՍ արմատական ​​շարժումը՝ Կատարի ակտիվ միջնորդությամբ։ Հստակեցվել է, որ Գազայի լրջորեն վիրավորված բնակիչներին նույնպես կարող են թույլ տալ հեռանալ։ ՀԱՄԱՍ-ը երեկ հայտարարել է, որ միջնորդների հետ պայմանավորվելու է մի քանի օտարերկրյա պատանդների ազատ արձակման շուրջ։

Ավելի վաղ ՀԱՄԱՍ-ը հրապարակել էր  այն օտարերկրացիների ցուցակը, որոնց կթույլատրվի լքել Գազայի հատվածը: Այն ներառում էր Հորդանանի, Ինդոնեզիայի, Ավստրիայի, Չեխիայի, Ֆինլանդիայի, Բուլղարիայի, Ավստրալիայի և Ճապոնիայի քաղաքացիներ։ Բացի այդ, շարժման ներկայացուցիչները դեմ չեն եղել երկքաղաքացիություն ունեցող պաղեստինցիների, Միջազգային Կարմիր խաչի (ԿԽՄԿ) և այլ հասարակական կազմակերպությունների աշխատակիցների հեռանալուն։