Ինչու՞ է «Հանրապետության հրապարակ» կայարանում կամարները դեղին գույն ներկված. պարզաբանում են Մետրոպոլիտենից
Երևանի մետրոպոլիտենի «Հանրապետության հրապարակ» կայարանում կամարները կիսով չափ վառ դեղին գույնով են ներկել, ինչը հարուցել է քաղաքացիների դժգոհությունը:
Մասնավորապես, համացանցում օգտատերերը նշում են, որ սա «անճաշակություն է», «տեսքը լրիվ փչացրել են», դեղին գույնը տեղին չէ, երբ տասնամյակներով այդ կամարները սպիտակով են ներկված եղել: Ոմանք էլ կատակում են՝ գուցե շուտով կապույտ երանգն էլ կավելացնեն ու կդառնա Ուկրաինայի դրոշը:
Auroranews-ը կապ հաստատեց Կարեն Դեմիրճյանի անվան մետրոպոլիտենի խոսնակ Տաթև Խաչատրյանի հետ, որպեսզի պարզաբանում ստանանք, թե ինչու՞ են հենց դեղին գույնը նախընտրել:
Մեզ հետ զրույցում Տաթև Խաչատրյանը նշեց. ««Հանրապետության հրապարակ» կայարանի միջսյունային հատվածը դեղին գույնով ներկված է գրեթե 1 ամիս։ Ներկը հիդրոծածկիչ հատկություն ունի։ Տրանսպորտային համակարգում դեղին գույնը զգոնացնող, զգուշացնող նշանակություն ունի այդ իսկ պատճառով ընտրվել է դեղինը։ Հավելյալ նշեմ նաև,որ շարժասանդուղքի աստիճանածածկույթի եզրաշերտերի գույնը նույնպես դեղին է։ Նպատակ ենք ունեցել որոշակի չափով պահպանել գունային լուծման ամբողջականությունը»։
