Վաշինգտոնը կշարունակի աջակցել Երևանին և Բաքվին խաղաղության համաձայնագրի հարցում. Պետդեպ
ԱՄՆ Պետդեպարտամենտի ներկայացուցիչը հայտարարել է, որ խաղաղության համաձայնագրի կնքումը բխում է ոչ միայն Հայաստանի և Ադրբեջանի, այլև ամբողջ աշխարհի շահերից։
Վաշինգտոնը կշարունակի աջակցել Հայաստանին և Ադրբեջանին խաղաղության համաձայնագրի կնքման հարցում։ Լրագրողների հետ ճեպազրույցի ժամանակ այս մասին հայտարարել է ԱՄՆ Պետդեպարտամենտի պաշտոնական ներկայացուցիչ Մեթյու Միլլերը։
«Մենք շարունակում ենք հավատալ, որ դա բխում է երկու կողմերի, տարածաշրջանի և նաև ամբողջ աշխարհի շահերից, որպեսզի կողմերը հասնեն խաղաղության հարցում համաձայնության։ Մենք կշարունակենք պնդել սա»,- ասել է Միլլերը՝ մեկնաբանելով Բրյուսելում նախատեսված` Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպման չեղարկումը։
Ավելի վաղ Հարավային Կովկասի հարցերով ԵՄ հատուկ ներկայացուցիչ Տոյվո Կլաարը հայտարարել էր, որ Բրյուսելում Հայաստանի և Ադրբեջանի ղեկավարների հանդիպումը չի կայանա ժամանակի սղության պատճառով:
