Ռուսաստանի Դաշնության անկախությունն ու անվտանգությունն արդյունավետ պաշտպանելու համար զինված ուժերի թիվը կավելանա: ՌԴ Անվտանգության խորհրդի փոխնախագահ Դմիտրի Մեդվեդևը հայտնել է, որ Վլադիմիր Պուտինի հանձնարարականով ինքը կհամակարգի 2024 թվականին պայմանագրով ՌԴ զինված ուժերի համալրման աշխատանքները։

«Գերագույն գլխավոր հրամանատարը որոշել է շարունակել աշխատանքը 2024 թվականին զինված ուժերը պայմանագրային զինծառայողներով համալրելու ուղղությամբ»,- ընդգծել է նա մասնագիտացված խորհրդակցության ժամանակ։

Բացի այդ, Մեդվեդևը հավելել է, որ երկրի անկախությունն ու անվտանգությունն արդյունավետ պաշտպանելու համար կավելացվի զինվորականների թիվը, ինչպես նաև ռուսական բանակը կամրապնդվի լրացուցիչ ռեսուրսներով։

«Հաջորդ տարի նախատեսվում է ձևավորել ևս մեկ բանակային կորպուս, 7 դիվիզիա, 19 բրիգադ, 49 գունդ և 1 նավատորմ»,- նշել է ՌԴ Անվտանգության խորհրդի փոխնախագահը։