ՌԴ ԱԳՆ-ն հայտնել է, թե որ դեպքում կարելի էր խուսափել Գազայի հատվածի հիվանդանոցին հարվածելուց

Եթե ՄԱԿ-ի Անվտանգության խորհուրդը հոկտեմբերի 16-ին ընդուներ Գազայի հատվածում հումանիտար հրադադարի ռուսական նախագիծը, ապա «Ալ Ահլի» հիվանդանոցի վրա հարվածից հնարավոր կլիներ խուսափել, հայտարարել են Ռուսաստանի ԱԳՆ-ում: Մեկնաբանությունը հրապարակված Է գերատեսչության կայքում։ Տեղեկատվությունը փոխանցում է gazeta.ru-ն: 

«Հնարավոր էր խուսափել հրթիռային հարվածից։ ՄԱԿ-ի Անվտանգության խորհրդի բանաձևի նախագծի վերաբերյալ ԱՄՆ վետոն հստակ ցույց տվեց Վաշինգտոնի իրական ձգտումները տարածաշրջանում»,- նշել են նախարարությունում։ 

Ռուսաստանի ԱԳՆ հայտարարության մեջ նաև նշված է, որ Մոսկվայի առաջարկած բանաձևը կարող է օգնել դադարեցնել լարվածության աճը և սանձել բռնությունը Պաղեստինի և Իսրայելի խաղաղ բնակիչների դեմ:

«Հենց ԱՄՆ-ի ձախողված քաղաքականությունն է պաղեստինա—իսրայելական ուղղությամբ հրահրել ներկայիս աղետալի սրացումը»,- եզրափակել են Ռուսաստանի արտաքին քաղաքական գերատեսչությունում:

Հիշեցնենք, որ հոկտեմբերի 17-ին հրթիռային հարված է հասցվել Գազայի հիվանդանոցին։  Պաղեստինի պաշտոնյաները Իսրայելին մեղադրել են ավիահարված հասցնելու մեջ: Իսրայելական կողմը կատարվածի համար մեղադրել է Պաղեստինյան «Իսլամական ջիհադին»: