Լիտվան վերահաստատում է իր աջակցությունը ՀՀ տարածքային ամբողջականությանը. Ինգրիդա Շիմոնիտե
Լիտվան վերահաստատում է Հայաստանի ինքնիշխանությանը և տարածքային ամբողջականությանն իր աջակցությունը: Այս մասին Երևանում ՀՀ վարչապետի հետ հանդիպումից հետո հայտարարեց Լիտվայի վարչապետ Ինգրիդա Շիմոնիտեն:
«Մեր ազգերը վաղուց բարեկամական կապեր ունեն: Եվ մեզ միավորում են համանման պատմական փորձառություններ, փորձառություններ՝ բռնաճնշման, անկախության համար պայքարի, ժողովրդավարությունն ընտրելու և դրան հավատարիմ մնալու»,-ասել է Լիտվայի վարչապետը:
Շիմոնիտեն ընդգծեց՝ հպարտ է, որ Լիտվան առաջին պետությունն էր, որ Հայաստանի անկախությունը ճանաչեց 1991-ին:
«Եվ ուրախ եմ, որ այսօր այստեղ եմ ու վերահաստատում եմ Լիտվայի աջակցությունը Հայաստանի ինքնիշխանությանը և տարածքային ամբողջականությանը, ինչպես նաև ժողովրդավար, բարեփոխված Հայաստանի կառուցումը շարունակելու ձեր կառավարության հանձնառությանը»,-ասել է Լիտվայի վարչապետը:
Շիմոնիտեն նաև ընգծեց, որ Լիտվան մտադիր է աջակցել Եվրամիություն-Հայաստան հարաբերությունների խորացմանը:
«Վերահաստատեցի իմ անկեղծ ցանկությունը՝ տեսնելու Հայաստանում Եվրամիության ներկայության ավելացում: Վերահաստատեցի, որ Լիտվան մտադիր է աջակցել Եվրամիություն-Հայաստան հարաբերությունների խորացմանը»,-ասել է Շիմոնիտեն:
Նա նշեց, որ Եվրամիությունը մնում է Հայաստանի հիմնական գործընկերը՝ բարեփոխումների գործընթացներում: Լիտվան պատրաստ է ավելացնել իր փորձագիտական աջակցությունը ԵՄ-Հայաստան համապարփակ և ընդլայնված գործընկերության համաձայնագրի իրագործմանը, նաև Հայաստանում ընթացող բարեփոխումների ընդհանուր գործընթացին:
Վարչապետները քննարկել են, թե ինչպես կարելի է Լիտվայի փորձագիտական կարողությունները օգտագործել տարբեր ոլորտներում:
Շիմոնիտեն համոզված է, որ բարեփոխումների գործընթացում Հայաստանի հաջողությունը կօգնի ամրապնդել Հայաստանի ժողովրդավարությունը, բարձրացնել դիմակայունությունը և ապահովել Հայաստանի արժանի տեղը ժողովրդավարությունների համայնքում:
«Անկախ, ինքնիշխան, անվտանգ ու բարեկեցիկ ժողովրդավարական Հայաստանը, ինչպես նաև խաղաղությունն ու կայունությունը Հարավային Կովկասում մեր ընդհանուր նպատակներն են: Լիտվան հանձնառու է դրանց հասնելու ուղղությամբ աշխատելու միասին»,-ասել է Լիտվայի վարչապետը:
