Գազայի հիվանդանոցի հրթիռակոծման ֆոնին չեղարկվել է Բայդենի այցը Հորդանան
Հորդանանի իշխանությունները չեղարկել են երկրի մայրաքաղաք Ամմանում Գազայի հատվածում տիրող իրավիճակին նվիրված քառակողմ գագաթնաժողովը, որին պետք է մասնակցեր նաև ԱՄՆ նախագահ Ջո Բայդենը: Այն նախատեսված էր հոկտեմբերի 18-ին։ Այդ մասին Al Jazeera-ին հայտնել է թագավորության արտաքին գործերի նախարար Այման աս-Սաֆադին: Դրանից հետո ամերիկյան CNN հեռուստաալիքը հաստատել է, որ Բայդենի այցը Հորդանան չեղարկվել է։
«Հորդանանը որոշել է չանցկացնել քառակողմ գագաթնաժողովը, որը նախատեսված էր չորեքշաբթի Ամմանում», - ասել է ալ-Սաֆադին: Նա նաև ընդգծել է, որ Ամմանում գագաթնաժողովը չեղարկելու որոշումը կայացվել է Եգիպտոսի, ԱՄՆ-ի և Պաղեստինի հետ խորհրդակցություններից հետո։ Այս բոլոր պետությունների ղեկավարները պետք է մասնակցեին Գազայի հատվածում իրավիճակի խաղաղ կարգավորմանը նվիրված հանդիպմանը։ Ավելի վաղ Աբասի գլխավորած պաղեստինյան Ֆաթհ շարժման ներկայացուցիչը հայտնել էր, որ Պաղեստինի առաջնորդը հրաժարվել է մասնակցել հանդիպմանը։
Գագաթնաժողովի չեղարկումը տեղի է ունեցել Գազայի հիվանդանոցի վրա հարձակման ֆոնին, որը տեղի է ունեցել հոկտեմբերի 17-ի երեկոյան։ Հարվածի հետևանքով զոհվել է առնվազն 800 մարդ։ Իսրայելական բանակը հայտարարել է, որ հետաքննում է միջադեպը և այն կապում է «Իսլամական ջիհադ»–ի հրթիռի անհաջող արձակման հետ: Իսրայելի վարչապետ Բենյամին Նեթանյահուն ասել է, որ իսրայելական զինվորականները չեն հարվածել հիվանդանոցին, և տեղի ունեցածի պատասխանատվությունը կրում են «Գազայի հատվածի բարբարոս ահաբեկիչները»։ Պաղեստինի նախագահ Մահմուդ Աբասը հարձակումն անվանել է «իսրայելական ռազմական հանցագործություն» և եռօրյա սուգ հայտարարել։
