ԱՄՆ–ն պատժամիջոցներ է սահմանում ՀԱՄԱՍ–ի դեմ. Axios

ԱՄՆ ֆինանսների նախարարությունը պատժամիջոցներ է պատրաստում պաղեստինյան իսլամական ՀԱՄԱՍ շարժման դեմ՝ կապված Իսրայելի վրա հարձակման հետ, հայտնում է ամերիկյան Axios պորտալը՝ հղում անելով սեփական աղբյուրներին։ Ակնկալվում է, որ պատժամիջոցները կարող են սահմանվել արդեն այս շաբաթ։ 

Ըստ Axios-ի զրուցակիցների, պատժամիջոցների ցուցակում կարող են ներառվել «ՀԱՄԱՍ–ի մի քանի առաջնորդներ»։ Պատժամիջոցների կարող են ենթարկվել նաև այն ոչ կառավարական կազմակերպությունները, որոնց միջոցով ֆինանսավորվում է պաղեստինյան իսլամական շարժումը։ ԱՄՆ ֆինանսների նախարարությունը, ինչպես գրում է Axios-ը, հույս ունի, որ օտարերկրյա կառավարությունների օգնությամբ կկարողանա ամբողջությամբ կասեցնել ՀԱՄԱՍ-ի անօրինական ֆինանսական գործունեությունը։ 

«Չնայած ՀԱՄԱՍ-ի առաջնորդներն ԱՄՆ-ում ակտիվներ չունեն, պատժամիջոցները կուժեղացնեն ճնշումը որոշ երկրների վրա, որտեղ նրանք գտնվում են, օրինակ՝ Քաթարը», - հրատարակությանը հայտնել է աղբյուրներից մեկը: 

Ակնկալվում է, որ ՀԱՄԱՍ-ի դեմ միայն «պատժամիջոցների առաջին փուլը» կընդունվի և ուժի մեջ կմտնի այս շաբաթ, իսկ «լրացուցիչ միջոցները» կձեռնարկվեն ավելի ուշ։ 

Իսրայելի և ՀԱՄԱՍ-ի միջև պատերազմը, որը սկսվել է հոկտեմբերի 7-ի առավոտյան՝ պաղեստինցի գրոհայինների կողմից իսրայելական տարածքների վրա հարձակումով, շարունակվում է արդեն տասն օր։ Վերջին տվյալներով՝ այս ընթացքում Իսրայելում մահացել է 1,4 հազար մարդ, Գազայի հատվածում զոհերի թիվը գերազանցել է 3 հազարը։