Ադրբեջանցիների կողմից Պետերբուրգում անցորդներին ծեծի ենթարկելու մասով քրգործ կհարուցվի

ՌԴ քննչական կոմիտեի ղեկավար Ալեքսանդր Բաստիրկինը հանձնարարել է զեկուցագիր պատրաստել և քրեական գործ հարուցել Սանկտ Պետերբուրգում ադրբեջանցիների կողմից պատահական անցորդներին ծեծի ենթարկելու մասով։ Այս մասին հայտնում է ՌԻԱ Նովոստին` վկայակոչելով ՌԴ ՔԿ մամուլի ծառայությանը։

Baza և մի շարք այլ Տելեգրամ-ալիքներ հայտնել են, որ Սանկտ Պետերբուրգում ադրբեջանցիների մի խումբ պատահական անցորդներին ծեծի է ենթարկում ու այդ կադրերը տեղադրում սոցցանցերում։

«Ռուսաստանի ՔԿ նախագահը Սանկտ Պետերբուրգի գլխավոր վարչության ղեկավարի պաշտոնակատար Բոբկով Օ.Վ.–ին հանձնարարել է քրեական գործ հարուցել և զեկույց պատրաստել»,– ասված է հաղորդագրությունում։

Համացանցում տեղադրված տեսանյութերում երևում է, թե ինչպես են երիտասարդները հարձակվում պատահական անցորդների վրա, ծեծում և հայհոյում նրանց։ Դա տեղի է ունենում Պետերբուրգի տարբեր հատվածներում, հիմնականում մետրոյի և առևտրի կենտրոնների մոտ։

Ավելի վաղ հայտնել էինք, որ ՌԴ-ի Սանկտ Պետերբուրգ քաղաքում ադրբեջանցի երիտասարդների ամբոխը քաոս է ստեղծում և ծեծի ենթարկում տեղի բնակիչներին առանց որևէ պատճառաբանության: