ՏԵՍԱՆՅՈՒԹ. Հացկերույթն ավարտվել է սպանությամբ. 39–ամյա տղամարդը ձերբակալվել է

ՀՀ Կոտայքի մարզի Հրազդան քաղաքի տներից մեկում տղամարդկանց հացկերույթն ավարտվել է սպանությամբ։ Տեղեկությունը հայտնում է ՀՀ ՆԳՆ մամուլի ծառայությունը։

«Հոկտեմբերի 11-ին, ժամը 11.44-ին, ՆԳՆ ոստիկանության Կոտայքի մարզի օպերատիվ կառավարման կենտրոն «Հրազդան» բժշկական կենտրոնից հաղորդում է ստացվել, որ կանչով մեկնել են Հրազդան քաղաքի Վանատուր թաղամասի տներից մեկը, որտեղ հայտնաբերվել է 64-ամյա տանտիրոջ դին»,–նշված է հաղորդագրության մեջ։

Ոստիկանները պարզել են, որ հոկտեմբերի 10-ի ժամը 21.00-ի սահմաններում տանտիրոջ հետ ընթրել և ոգելից խմիչք են օգտագործել 41-ամյա, 55-ամյա և 39-ամյա երեք տղամարդ, ինչից հետո վիճաբանություն է սկսվել տանտիրոջ և 39-ամյա տղամարդու միջև:

39-ամյա տղամարդը ձեռքերով և ոտքերով հարվածներ է հասցրել 64-ամյա տանտիրոջը, ապա բութ առարկայով խփել է տղամարդու գլխին, ինչից հետո տանտերը մահացել է։

Ձեռնարկված միջոցառումների արդյունքում 39-ամյա տղամարդը հայտնաբերվել, ձերբակալվել և տեղափոխվել է ոստիկանության Հրազդանի բաժին։

Հրազդանի բնակիչ 39-ամյա տղամարդը տվել է խոստովանական ցուցմունք: Սպանության հատկանիշներով քրեական վարույթ է նախաձեռնվել: Կատարվում է նախաքննություն: