Կիմ Չեն Ընը Ռուսաստանում դիտել է կործանիչների հավաքման գործընթացը

Հյուսիսային Կորեայի ղեկավար Կիմ Չեն Ընը Ռուսաստան պաշտոնական այցի շրջանակներում ծանոթացել է Ամուրի Կոմսոմոլսկում գտնվող ավիաշինական գործարանի ինժեներային կենտրոնի և արտադրամասերի հետ։ Այս մասին հաղորդվում է ՌԴ կառավարության կայքում։

Կիմ Չեն Ընը դիտել է կործանիչների հավաքման գործընթացը, ինչպես նաև Սու-35 ինքնաթիռների և հինգերորդ սերնդի Սու-57 ավիացիոն համալիրի վերջնական հավաքման արտադրամասը։

Այցի վերջում ԿԺԴՀ ղեկավարը և ՌԴ փոխվարչապետ, արտադրության և առևտրի նախարար Դենիս Մանտուրովը հետևել են Սու-35 բազմաֆունկցիոնալ կործանիչի ցուցադրական թռիչքին։

Հիշեցնենք՝ ԿԺԴՀ ղեկավարը ՌԴ էր ժամանել նախագահ Վլադիմիր Պուտինի հրավերով։ Սեպտեմբերի 13-ին Պուտինն ու Կիմ Չեն Ընը բանակցություններ են վարել «Վոստոչնի» տիեզերակայանում ինչպես պատվիրակությունների մասնակցությամբ, այնպես էլ դեմ առ դեմ։ Նշենք, որ Ռուսաստանն առաջին երկիրն է, ուր Կիմ Չեն Ընն այցելում է կորոնավիրուսի համավարակից ի վեր։ Իր հերթին Կիմ Չեն Ընը Վլադիմիր Պուտինին հրավիրել է այցելել Հյուսիսային Կորեա։

[17e4638208851c57cc665129f393162a.jpg]

[3f905f2e10805a2ad1d411b569974649.jpg]

[78312a5656f17e01f63c8e7cc51205a4.jpg]

[a81350b841c8ebdf0c52f61d8c3620c6.jpg]