Վրացական համարանիշներով ավտոմեքենաներ ներմուծող վարորդների հետ ՊԵԿ-ից առայժմ որևէ մեկը չի հանդիպել

Վրացական համարանիշներով ավտոմեքենաներ ներմուծող վարորդների հետ, որոնք բողոքում են նոր նախագծից, ըստ որի վրացական պետհամարանիշերով մեքենաներով Հայաստան մուտքի ժամանակ ՀՀ քաղաքացիները և երկքաղաքացիները պետք է որպես գրավ վճարեն մաքսազերծման ամբողջ գումարը, ՊԵԿ-ից առայժմ որևէ մեկը չի հանդիպել: Այս մասին տեղեկանում ենք NEWS.am-ից, որին հայտնել են վարորդները:

Նշենք, որ նրանք օգոստոսի 28-ին բողոքի ակցիա էին իրականացնում ՊԵԿ-ի դիմաց՝ պահանջելով չեղարկել քննարկման փուլում գտնվող օրենքի ընդունումը։

Նրանք նշել էինք, որ նոր նախագծով մաքսային գրավի ամբողջ գումարը պետք է միանգամից թողնվի դեպոզիտ, որը դուրս գալուց հետ է վերադարձվելու:

Հիշեցնենք, որ այս թեմայի առնչությամբ այսօր ԱԺ նիստում ՊԵԿ փոխնախագահ Արթուր Մանուկյանն ասել էր, որ կարգավորումը չի ենթադրելու, որ վրացական համարանիշներով մեքենաները պետք է պարտադիր մաքսազերծվեն.

«Հարցը վերաբերում է այն թեթև մարդատար ավտոմեքենաներին, որոնք ժամանակավոր՝ մեկ տարով, ներմուծվում են Հայաստան: Ժամանակավոր ներմուծման պայման է հանդիսանում նաև նախապես ապահովում ներկայացնելը: Քանի որ մեկ տարին անցնելուց հետո այդ մեքենաները շարունակում են մնալ Հայաստանում, կառավարությունում քննարկվում է հարցի լուծման մի շարք տարբերակներ: Դա ոչ թե վերաբերելու է այն մեքենաներին, որոնք ներմուծվել են և պետք է պարտադիր մաքսազերծվեն, այլ ՊԵԿ-ի առաջարկն է այդ ապահովագրական ծածկույթը որպես ապահովում ներկայացնելու փոխարեն, կանխիկ գումարով դեպոզիտ ներկայացնել: Սա է եղել կարգավորումը, հարցը քննարկման փուլում է»: