ՏԵՍԱՆՅՈՒԹ. «Մեր դիվանագիտությունը մի զբոսայգում մի հատ իշաոտնուկ դրած, վրան նստած է». Փաշինյան
Կառավարության այսօրվա նիստում քննարկվեց «Պետական բյուջեում վերաբաշխում և ԱԳՆ-ին գումար հատկացնելու մասին» հարցը։
ԱԳՆ փոխնախարար Պարույր Հովհաննիսյանը հայտնեց, որ Միացյալ Թագավորությունում Հայաստանի դեսպանությունը տեղակայացված է Լոնդոնի Հայ տան կողմից տրամադրված շենքում, բայց նախորդ տարի դեսպանությունը պետք է տարածքն ազատի։ Փոխնախարարը նաև նշեց, որ բացի այդ, տարածքը քիչ է դեսպանության աշխատանքը պատշաճ իրականացնելու համար։
Վարչապետ Նիկոլ Փաշինյանն արձագանքեց թե շատ վաղուց ուզել են դուրս գալ այն տարածքից, որտեղ հիմա գտնվում է դեսպանությունը։
«Այն լուսանկարները, որ տեսել եմ, կներեք, բայց իրեն հարգող պետությունը չի կարող այդ տարածքը համարի դեսպանատուն։ Ցավոք, մենք շատ տեղերում այս խնդիրն ունենք։ Ասում ենք՝ բա ո՞ւր է մեր դիվանագիտությունը. մեր դիվանագիտությունը մի զբոսայգում մի հատ իշաոտնուկ դրած, վրան նստած է՝ դրոշն էլ վերևը կախած, ասում ենք՝ սա մեր դեսպանատունն է։
Իմ անձնական դիրքորոշումն է եղել, որ մենք բոլոր տեղերում ունենանք պատշաճ դեսպանատներ։ Մի տեղ տանիքն է կաթում, մի տեղ հատակն է ծակ, մի տեղ պատուհանը չկա, չի կարելի, սա անթույլատրելի է»,- արձանագրեց վարչապետը։
Նա տեղեկացրեց, որ Հայաստանը Լոնդոնում 17 միլիոն ֆունտ ստերլինգով դեսպանատուն է գնում։
Նշենք, որ Կառավարության որոշմամբ շուրջ 8 մլրդ 388 մլն դրամ կհատկացնի Լոնդոնի կենտրոնում 5 հարկանի շենք ձեռք բերելու համար։
