Էջմիածնի «Քիմիկների» զորամասի անհետ կորած զինծառայողների ծնողները կգիշերեն ՊՆ–ում
Էջմիածնի «Քիմիկների» զորամասից 44-օրյա պատերազմ մեկնած և մինչ օրս անհետ կորած համարվող զինծառայողների ծնողները կգիշերեն պաշտպանության նախարարությունում։ Այս մասին Sputnik Արմենիայի հետ զրույցում ասել է անհետ կորածի ծնող Կարինե Մանավազյանը։
«Մեզ այստեղ էին հրավիրել պաշտպանության նախարար Սուրեն Պապիկյանի հետ հանդիպման համար։ Մենք այդ հանդիպմանը սպասում ենք մայիսի 2–ից։ Առավոտյան ժամը 11.00–ից այստեղ ենք ու պարզվում է, որ նախարարը տեղում չէ և մեզ պետք է ընդունի նրա տեղակալ Արման Սարգսյանը։ Մենք մոտ 2 ժամ նրա հետ խոսեցինք, բայց ոչ մի հարցի պատասխան չստացանք։ Ասում է` մենք ստույգ տեղեկություն չունենք, թե ձեր երեխաները որտեղ են։ Այստեղից չենք հեռանալու այնքան, մինչև նախարարը մեզ չընդունի»,–ասել է Մանավազյանը։
Նրա խոսքով` իրենց ուզում են համոզելով շենքից հանել, բայց դա չի ստացվելու։
Հավելենք, որ ծնողները պարբերաբար բողոքի ակցիաներ են իրականացնում և պահանջում բարձրաստիճան պաշտոնյաների հետ հանդիպում։
