1 միլիարդ դոլարի նոր փաթեթ. Բլինքենն ու Զելենսկին հանդիպել են

Ուկրաինայի նախագահ Վլադիմիր Զելենսկին հանդիպել է սեպտեմբերի 6-ին պաշտոնական այցով Կիևում գտնվող ԱՄՆ պետքարտուղար Էնթոնի Բլինքենի հետ։ Իր թելեգրամյան ալիքում Ուկրաինայի նախագահը շնորհակալություն է հայտնել ԱՄՆ ներկայացուցիչներին պարբերական պաշտոնական այցերի համար։ 

Բանակցությունների ընթացքում Վլադիմիր Զելենսկին «մանրամասն» տեղեկացրել է ռազմական հակամարտության գոտում տիրող իրավիճակի, ինչպես նաև Ուկրաինայի Զինված ուժերի պաշտպանական կարիքների մասին՝ ներառյալ հեռահար զենքեր, հրետանային և զրահատեխնիկա:

Նաև Զելենսկին հայտարարել է Ուկրաինայում հակաօդային պաշտպանության համակարգի ուժեղացման և էներգետիկ ոլորտում ԱՄՆ աջակցության անհրաժեշտության մասին, հատկապես ձմռան նախաշեմին։ Կողմերը քննարկել են նաև Վլադիմիր Զելենսկու խաղաղության բանաձևի իրականացման ուղիները։ 

Էնթոնի Բլինքենը ռազմական հակամարտության սկզբից ի վեր երրորդ անգամ է այցելել Ուկրաինա։ Այցի ընթացքում նա հայտարարել է 1 մլրդ դոլարի օգնության նոր փաթեթի մասին, որից 655 մլն դոլարը կուղղվի ռազմական նպատակներին։ 1 միլիարդ դոլար գումարը ներառում է Պենտագոնի՝ ավելի վաղ հայտարարված զենքի և զինամթերքի փաթեթը, ներառյալ՝ սպառված ուրանի արկերը: