Ուֆայի մեկուսարանում մահացած են գտել նռնակ պայթեցնելու սպառնալիքներ հնչեցրած զինվորին

Ուֆայի քննչական մեկուսարանում մահացած են գտել զինվորականի, ով օգոստոսի սկզբին սպառնացել է նռնակ պայթեցնել մայրուղու վրա՝ բենզալցակայանի մոտ և հանձնվել է այն բանից հետո, երբ Բաշկորստոստանի ղեկավար Ռադի Խաբիրովը խոստացել է օգնել իրեն։ Նախնական տեղեկություններով՝ նա ինքնասպան է եղել, գրում է KP-Ufa-ն՝ վկայակոչելով հետաքննությանը մոտ կանգնած աղբյուրին։ 

112 թելեգրամյան ալիքի փոխանցմամբ՝ 39-ամյա Իլդար Բուլատովի դին իր խցում հայտնաբերելուց հետո Քննչական կոմիտեն հետաքննություն է սկսել։ Baza հրատարակությունը պարզաբանում է, որ դեպքը տեղի է ունեցել Ուֆայի թիվ 1 քննչական մեկուսարանում։ 

Բաշկիրիայի հանրային մոնիտորինգի հանձնաժողովի նախագահ Օլեգ Գալինը ТАСС-ի հետ զրույցում նույնպես հայտնել է, որ զինվորականն ինքնասպան է եղել քննչական մեկուսարանում։ «Ըստ միջանցքի տեսախցիկների ձայնագրության՝ պարզ է, որ ոչ ոք չի եկել նրա մոտ, նրան խցից դուրս չեն բերել»,- ընդգծել է նա։ 

Ինչպես հայտնում է UFA1.ru պորտալը՝ տղամարդը պայմանագրային զինծառայող է եղել Ուկրաինայում ռազմական գործողության գոտում՝ Ռուսաստանի հերոս Ալեքսանդր Դոստավալովի անվան բաշկիրական գումարտակի կազմում։ Նա գնացել է այնտեղ որպես կամավոր և հետագայում առանց թույլտվության լքել Ռոստովի մարզի զորամասը: Նրա դեմ քրեական գործ է հարուցվել։