15:00 Լուրերը մեկ տողով. Ծառուկյանի սեփականությունն անցել է քաղաքապետարանին. Թուրքիան Սև ծովի անվտանգության մասին

Անցած ժամվա լուրերը՝ հակիրճ և բովանդակային.

•Երևանի քաղաքապետարանը միակողմանիորեն խզել է պայմանագիրը և իր տնօրինությանն է վերցրել համայնքային հողի վրա օրենսդրական խախտումներով կառուցված «Մուլտի Վելնես» մարզասրահի շենքը։ Քաղաքային իշխանությունները մտադիր են կառույցն օգտագործել որպես սոցիալական բաղադրիչով մարզական կենտրոն:

•ՀՀ դատախազությունը հայտնաբերել է, որ «Արարատցեմենտ» ընկերությունը տարիներ շարունակ խախտել է ընդերքօգտագործման թույլտվության պայմանները և չի կատարել հարկային պարտավորությունները։ Փաստի առթիվ հաղորդում է ներկայացվել քննչական մարմին, իսկ ընկերության մյուս գույքերի ձեռքբերման իրավաչափության ուսումնասիրությունը շարունակվում է։

•«Ուժեղ Հայաստան» կուսակցության ներկայացուցիչները Լոռու մարզի Ագարակ համայնքում ծանոթացել են բնակիչների սոցիալական խնդիրներին: Տեղացիները բարձրաձայնել են մշտական աշխատատեղերի բացակայության և արդեն մի քանի ամիս տրանսպորտային կապի բացակայության պատճառով ստեղծված դժվարությունների մասին։

•Թուրքիայի արտաքին գործերի նախարարը հայտարարել է, որ Անկարան դեմ է ռուս-ուկրաինական հակամարտության տարածմանը Սևծովյան տարածաշրջան և հարձակումներին նավահանգիստների ու նավերի վրա: Թուրքական կողմը նաև համաձայնել է ստանձնել Սև ծովում անվտանգության երաշխիքների ծովային բաղադրիչի ղեկավարումը։

•Հարավային Կորեայի իշխանությունները խորհրդարանում ներկայացված օրինագծերի շրջանակում քննարկում են մինչև 14 տարեկան երեխաների համար սոցիալական ցանցերից օգտվելն արգելելու հնարավորությունը: Նախաձեռնության նպատակն է սահմանափակել անչափահասների մուտքը վիրտուալ հարթակներ:

•Կրեմլը հայտարարել է, որ Ուկրաինայի պաշտպանության նախարարի փոփոխությունը Մոսկվայի համար էական նշանակություն չունի հատուկ ռազմական գործողության համատեքստում: Ռուսական կողմի համար կարևոր է միայն այն, թե ով կընդունի հակամարտության ավարտին հանգեցնող որոշումները։

•Հայաստանի կառավարությունը 25 միլիոն դոլարով բարձր արտադրողականության հաշվողական ռեսուրսներ ձեռք կբերի Կոտայքում տարածաշրջանի ամենահզոր տվյալների կենտրոնը ստեղծելու համար: Ստացված սերվերային ու ամպային ենթակառուցվածքները պետական աջակցության շրջանակում կտրամադրվեն արհեստական բանականության ոլորտի ստարտափներին, բուհերին և գիտական խմբերին: