Բելառուսն ադեկվատ է արձագանքում ՆԱՏՕ-ի գործողություններին. Վոլֆովիչ

Որոշ օտարերկրյա քաղաքական գործիչներ դեռ մտածում են սառը պատերազմի հասկացողություններով: Նրանք իրենց սադրիչ հայտարարություններով ու չմտածված գործողություններով ամեն կերպ փորձում են լարել իրավիճակը։ Այս մասին հայտարարել է Բելառուսի Անվտանգության խորհրդի պետքարտուղար Ալեքսանդր Վոլֆովիչը, տեղեկացնում է ԲԵԼՏԱ-ն։

«Ինքներդ եք տեսնում, թե ինչ եռանդով են մեր հարևանները ձգտում իրականացնել Վիլնյուսում ՆԱՏՕ-ի վերջին գագաթնաժողովի որոշումներում ամրագրված սկզբունքները», - ասել է Անվտանգության խորհրդի պետքարտուղարը։ 

«Եվ դա անում են անգամ ժամանակից շուտ, որպեսզի հաճոյանան իրենց արտասահմանյան համակարգողներին։ Կրկին արևելքից երևակայական սպառնալիքների մասին հայտարարություններ ենք լսում։ Նման մտացածին պատրվակներով միջոցներ են ձեռնարկվում Լեհաստանի և Բալթյան երկրների ռազմականացման ուղղությամբ։ Վարշավան պատրաստակամություն է հայտնել իր տարածքում ամերիկյան մարտավարական միջուկային մարտագլխիկներ  ընդունել։ Գնվում են ժամանակակից զինատեսակներ»,- ասել է նա։

Վոլֆովիչն ավելացրել է, որ ներկայումս լեհական բանակի կազմում շարունակվում է 1-ին մեքենայացված դիվիզիայի կազմավորումը, որը տեղակայվելու է մեր արևմտյան սահմանների մոտ։ Անհիմն շահարկելով Բելառուսում «Վագներ» ՄՌԿ-ի առկայությունը՝ Լեհաստանը սահմանամերձ շրջաններում երկու ուժեղացված մեքենայացված գումարտակ է տեղակայել: Լիտվան նույնպես նախատեսում է մեծացնել իր ռազմական զորախումբը։ Վերջերս Վիլնյուսը հայտարարեց իր տարածքում ամերիկյան ստորաբաժանումների ներկայությունը մինչև 2025 թվականը երկարաձգելու մասին։ Միայն վերջին երկու ամսվա ընթացքում Լիտվայում և Լատվիայում ՆԱՏՕ-ի զորքերի մասնակցությամբ անցկացվել է ավելի քան 10 վարժանք։ Այս ամենը, անկասկած, թեժացնում է ռազմաքաղաքական իրավիճակը տարածաշրջանում։

«Այս պայմաններում մենք իսկապես մանրամասն ուսումնասիրում ենք Ուկրաինայում Հատուկ ռազմական գործողության  անցկացման փորձը։ 

«Վագներ»  ՄՌԿ-ի հրահանգիչների հետ աշխատում ենք ժամանակակից մարտեր վարելու մարտավարության վրա։ Եվ մենք դա չենք թաքցնում։ Ամեն ինչ արվում է բացառապես պաշտպանական նպատակներով։ Նույնը վերաբերում է Բելառուսում ռուսական մարտավարական միջուկային զենքի տեղակայմանը»,- ասել է Ալեքսանդր Վոլֆովիչը։ 

«Ընդհանուր առմամբ, կարող եմ վստահորեն ասել, որ ՆԱՏՕ-ի բլոկի և նրա առանձին անդամների գործունեության վերաբերյալ մեր բոլոր կանխատեսումները լիովին հաստատվել են։ Իհարկե, մենք ձեռքներս ծալած չենք նստում, այլ համարժեք արձագանքման միջոցներ ենք ձեռնարկում»,- եզրափակել է պաշտոնյան։