Բաքուն մտահոգված է Հայաստանի և Հնդկաստանի միջև ռազմական համագործակցության խորացմամբ
Բաքուն մտահոգված է Հայաստանի և Հնդկաստանի միջև ռազմական համագործակցության խորացմամբ: Այս մասին գրում է Sputnik Ադրբեջանը։
Նշվում է, որ Ադրբեջանի Հանրապետության նախագահի օգնական Հիքմեթ Հաջիևը այս հարցը քննարկել է Ադրբեջանում Հնդկաստանի դեսպան Սրիդարան Մադհուսուդհանանի հետ հանդիպման ժամանակ։
Հաջիևը նաև մտահոգություն է հայտնել ԶԼՄ-ներում շրջանառվող լուսանկարների և տեսանյութերի առնչությամբ, որոնք վերաբերում են հնդկական արտադրության սպառազինության համակարգեր Իրանի տարածքով Հայաստան տեղափոխելուն։
Բաքուն կոչ է արել Նյու Դելիին վերանայել Հայաստանին զենք մատակարարելու Հնդկաստանի որոշումը։
«Այն ժամանակ, երբ Ադրբեջանը բանակցում է Հայաստանի հետ խաղաղության պայմանագրի շուրջ, Հնդկաստանի կողմից այս երկրին զենք մատակարարելը ճանապարհ է բացում դեպի ռազմականացում և իրավիճակի սրում, խոչընդոտում է կայուն խաղաղության և անվտանգության հաստատմանը Հարավային Կովկասի տարածաշրջանում», - ասել է Հաջիևը։
