Տեսնելով, որ Ղարաբաղի ապագան կանխորոշված է, հայերը «հիստերիայի» մեջ են. ռուս փորձագետ
Կասպյան ռազմավարական հետազոտությունների ինստիտուտի (Ռուսաստան) գլխավոր տնօրեն, փորձագետ Իգոր Կորոտչենկոն «մեկնաբանել է» Մոսկվա-Բաքու հարաբերությունները, «վերլուծել» է տարածաշրջանում կատարվողը: Նշել է, իբր տեսնելով, որ Ղարաբաղի ապագան կանխորոշված է, հայերը «հիստերիայի» մեջ են։
«Նրանք նամակներ են ուղարկում ողջ միջազգային հանրությանը՝ պահանջներով, պայմաններով, բողոքներով և մեղադրանքներով, որ ինքը՝ միջազգային հանրությունը, ընդունում է հայերի «սպանությունը»։ Նպատակը Հայաստանի և Ադրբեջանի միջև խաղաղություն թույլ չտալն է, թույլ չտալը, որ որևէ փաստաթուղթ ստորագրվի: Նրանք, ովքեր «ռևանշ» են ուզում, անընդհատ ճնշում են գործադրում Հայաստանի վարչապետի վրա»,- նշել է նա:
Ըստ նրա` իրենք համաշխարհային ռազմաքաղաքական իրավիճակի բուռն զարգացման փուլում են։
«Ամեն ինչ հեշտ չէ, հեշտ չէ նաև Հարավային Կովկասում։ Պետք է հանգիստ գնահատել իրավիճակը։ Մոսկվայի և Բաքվի հարաբերությունների հիմքը դաշնակցային փոխգործակցության մասին հռչակագիրն է։ Մենք գերազանց հարաբերություններ ունենք ղեկավարների հետ: Օբյեկտիվորեն Ադրբեջանը վաղուց կկարողանար իր վերահսկողության տակ վերադարձնել Ղարաբաղի մնացած հատվածը։ Բայց Ադրբեջանի ղեկավարը, որպես գերազանց դիվանագետ, հիանալի հասկանում է իրավիճակը և այն հետևանքները, որոնց կարող է հանգեցնել նման քայլը։
Նախ, կա եռակողմ հայտարարություն, որը ստորագրել են Ռուսաստանի, Ադրբեջանի և Հայաստանի ղեկավարները, որտեղ հստակ շարադրված են Ղարաբաղում ռուսական խաղաղապահ կոնտինգենտի տեղակայման ժամկետները։ Երկրորդ՝ ցանկացած որոշում կայացնելիս ամեն ինչ պետք է հաշվարկված լինի, որպեսզի չվնասեն մեր բարեկամական հարաբերություններին։ Պատասխանատու փոխըմբռնում կա և՛ Մոսկվայում, և՛ Բաքվում։ Բայց, ցավոք, նա չկա ո՛չ Երեւանում, ո՛չ էլ Ղարաբաղի հայ անջատողականների մեջ»,- ասել է Կորոտչենկոն։
