Սենատոր Գրիգորի Կարասինը պատասխանել է ադրբեջանցի պատգամավորի ոչ կոռեկտ հայտարարություններին

Ռուսաստանի Դաշնային խորհրդի միջազգային գործերի կոմիտեի նախագահ Գրիգորի Կարասինն իր թելեգրամյան ալիքում արձագանքել է Ադրբեջանի Միլի մեջլիսի պատգամավոր Գուդրաթ Հասանգուլիևի կոշտ հայտարարություններին:

«Ես չեմ կարող չարձագանքել Ադրբեջանի Միլի մեջլիսի պատգամավոր Գուդրաթ Հասանգուլիևի ոչ բարեկամական հայտարարություններին։ Ի պատասխան ՌԴ ԱԳՆ այս տարվա հուլիսի 15-ի հայտարարության՝ նա պնդում է, որ «Ռուսաստանը չի ցանկանում խաղաղություն Հարավային Կովկասում և շահագրգռված է շարունակել արյունալի հակամարտությունն ադրբեջանցի և հայ ժողովուրդների միջև։ Խորհրդարանականն իրեն նույնիսկ թույլ է տվել մեր երկիրն անվանել «անվստահելի ու արյունարբու» և պահանջել դուրս բերել ռուսական խաղաղապահ զորակազմը»,- գրել է նա՝ հույս հայտնելով, որ նման հակառուսական հարձակումները չեն արտացոլում Բաքվի պաշտոնական դիրքորոշումը։ Ըստ նրա՝ կարևոր է, որ դրանց գնահատական ​​տան նաև Ադրբեջանի խորհրդարանում։

«Պատգամավորին հիշեցնեմ, որ ԼՂ հիմնախնդրի բոլոր փուլերում, հիմնականում Ռուսաստանի ջանքերի շնորհիվ, հնարավոր եղավ դադարեցնել ռազմական գործողությունները, կողմերին նստեցնել բանակցային սեղանի շուրջ և հասնել փոխզիջումների։

2020 թվականի աշնանը նախագահ Պուտինը դադարեցրեց արյունահեղությունը տարածաշրջանում: Մոսկվայի մասնակցությամբ մշակվել են ամենաբարձր մակարդակով եռակողմ պայմանագրեր, որոնք հիմք են հանդիսանում հայ-ադրբեջանական հարաբերությունների կարգավորման համար։

Ռուսաստանի, Ադրբեջանի և Հայաստանի ղեկավարների որոշմամբ տեղակայված ռուս խաղաղապահները խաղաղություն են հաստատել Ղարաբաղում՝ օգնելով լուծել առաջնահերթ հումանիտար և սոցիալ-տնտեսական խնդիրները։ Միայն մեկ փաստ՝ 2020 թվականի նոյեմբերից զորախումբը ականազերծել է ավելի քան 2,5 հազար հեկտար տարածք, այդ թվում՝ գրեթե 700 կմ ճանապարհ։ Մեր խաղաղապահները Ղարաբաղի հայերին և ադրբեջանցիներին հնարավորություն են տվել քննարկել խաղաղության օրակարգը։ Մենք բացարձակապես անպատասխանատու ենք համարում ռուսական զորախմբի դուրսբերման պահանջները»,- գրել է Կարասինը։

Նրա խոսքով՝ Հասանգուլիևի հայտարարությունն ամբողջությամբ հակասում է Ռուսաստանի Դաշնության և Ադրբեջանի Հանրապետության միջև դաշնակցային փոխգործակցության մասին 2022 թվականի փետրվարի 22-ի հռչակագրի ոգուն և բովանդակությանը և չի համապատասխանում Բաքվի ու Մոսկվայի բարձր մակարդակի հարաբերություններին, այդ թվում՝ խորհրդարանական ուղղությամբ։

«Մենք Դաշնային խորհրդում պատրաստ ենք շարունակելու կառուցողական երկխոսությունը ադրբեջանցի գործընկերների հետ, որոնք, ինչպես գիտենք, բացարձակ մեծամասնություն են»,- գրել է Կարասինը։

Հիշեցնենք, որ ադրբեջանցի պատգամավորը հայտարարել էր․ «Անհրաժեշտ է ԱԳՆ կանչել Ռուսաստանի դեսպանին և նրան ընդգրկուն տեղեկություն տրամադրել այն քայլերի մասին, որոնք կձեռնարկի Ադրբեջանը: Անհրաժեշտ է նաև Մոսկվայից պահանջել այսուհետ զերծ մնալ սադրիչ վարքագծից, որը մեր երկրների միջև ստորագրված փաստաթղթերը վերածում է անօգուտ թղթերի և գործընկերների և հարևանների աչքում Ռուսաստանը ներկայացնում որպես անվստահելի և արյունարբու երկրի:
 

«Մենք պետք է պաշտոնապես հայտարարենք, որ Ադրբեջանում գտնվելու համար ռուս խաղաղապահների մանդատի երկարաձգման մասին խոսք լինել չի կարող։ 2025 թվականը, երբ լրանում է ռուս խաղաղապահների մանդատի ժամկետը, նաև խաղաղ բանակցությունների վերջնաժամկետ է։ Եթե հստակ չնշենք այդ դիրքորոշումը, ապա բանակցությունները կշարունակվեն հավերժ»։