Վաղը կհանդիպեն Փաշինյանն ու Ալիևը․ կկայանա 6-րդ եռակողմ հանդիպումը․ ԵՄ պաշտոնյա

Հուլիսի 15-ին Բրյուսելում կկայանա Եվրոպական խորհրդի նախագահ Շառլ Միշելի, Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի վեցերորդ եռակողմ հանդիպումը՝ Բաքվի և Երևանի միջև հարաբերությունների կարգավորման ողջ օրակարգի շուրջ, լրագրողներին հայտնել է ԵՄ պաշտոնյան, գրում է Интерфакс-ը։

«Այս գործընթացը շարունակվում է գրեթե երկու տարի: Մենք կարծում ենք, որ առաջնորդների մակարդակով փոխգործակցությունն անհրաժեշտ է խաղաղ կարգավորմանը նպաստելու և հակամարտության սրումը կանխելու համար: Բանակցությունների ընթացքում կքննարկվեն օրակարգային բոլոր հարցերը»,- ասել է նա: 

Սա, ըստ նրա, ներառում է «մարդասիրական հարցեր, սահմանների սահմանազատում, խաղաղության պայմանագիր, Լեռնային Ղարաբաղի հայերի իրավունքներն ու անվտանգությունը, կապեր»: 

Նա նաև հատուկ մատնանշել է «Ղարաբաղի հայերին վերաբերող հումանիտար հարցերի» քննարկումը։ 

ԵՄ պաշտոնյան հիշեցրել է, որ բացի Եվրոպական խորհրդի նախագահի և Ադրբեջանի ու Հայաստանի ղեկավարների հինգ եռակողմ հանդիպումներից, եղել են նաև երկու հանդիպում Ֆրանսիայի նախագահ Էմանուել Մակրոնի մասնակցությամբ, որոնցից մեկը՝ հունիսի 1-ին Քիշնևում, հնգակողմ ձևաչափով՝ Գերմանիայի կանցլեր Օլաֆ Շոլցի մասնակցությամբ։ 

Ավելի վաղ Փաշինյանը հայտարարել էր առաջիկա եռակողմ հանդիպման մասին՝ ՀՀ կառավարության նիստում։ 

Նա հույս էր հայտնել, որ Երևանի և Բաքվի միջև խաղաղության համաձայնագրի շուրջ բանակցություններում հնարավոր կլինի առաջընթաց գրանցել։

Արդեն հայտնել էինք, որ Փաշինյանն ու Ալիևը արդեն Բրյուսելում են։ Ընթանում է Ալիև- Միշել հանդիպումը։