ԱՄՆ Սենատի հանձնաժողովը հաստատել է Մարկ Լիբիի թեկնածությունը Բաքվում դեսպանի պաշտոնում

ԱՄՆ Սենատի արտաքին հարաբերությունների հանձնաժողովը հուլիսի 13-ի ուշ երեկոյան հաստատել է նախագահ Ջո Բայդենի ներկայացրած թեկնածուին Ադրբեջանում դեսպանի պաշտոնում՝ ճանապարհ բացելով առաջիկա օրերին Սենատի ամբողջական կազմի կողմից նրա հավանական հաստատման համար, հայտնում են ադրբեջանական ԶԼՄ-ները։

«Նրա թեկնածությունն արդեն ընդգրկված է Սենատի գործադիր օրացույցում»,- ասել է աղբյուրը։ 

Հունիսի 14-ի լսումների ժամանակ պրոֆեսիոնալ դիվանագետ Մարկ Լիբիին հարցեր են ուղղվել ղարաբաղյան հիմնախնդրի խաղաղ կարգավորման բանակցությունների, մարդու իրավունքների և անվտանգության ոլորտում ԱՄՆ-Ադրբեջան համագործակցության վերաբերյալ։ 

Լիբբին ասել է, որ իր թեկնածության հաստատման դեպքում կաջակցի Վաշինգտոնի ջանքերին` նպաստելու արդար և կայուն խաղաղության համաձայնագրին: «Այս ողբերգական հակամարտությունը ցավի և անվստահության դառը ժառանգություն է թողել», - ավելացրել է նա: 

Սակայն խաղաղության համաձայնագրի ստորագրումը, ինչպես Լիբբին է ասել, «միայն առաջին քայլն է»։ «Հաստատվելու դեպքում ես կգլխավորեմ Բաքվում դեսպանատան միջգերատեսչական թիմը՝ աջակցելու հնարավոր կարգավորման իրականացմանը», - ասել է նա։ 

Լիբիի խոսքով, խաղաղության համաձայնագիրը Վաշինգտոնին ու Բաքվին թույլ կտա համագործակցությունը նոր մակարդակի հասցնել։