ՄԱԿ-ի գլխավոր քարտուղարը նամակ է ուղարկել Պուտինին
ՄԱԿ-ի գլխավոր քարտուղար Անտոնիո Գուտերեշը նախօրեին նամակ է հղել ՌԴ նախագահ Վլադիմիր Պուտինին՝ հացահատիկի գործարքի ռուսական մասի իրականացման առաջարկներով։ Այս մասին հայտնում է ТАСС-ը՝ հղում տալով ՄԱԿ-ի գլխավոր քարտուղարի ներկայացուցիչ Ստեֆան Դյուժարիկին։
«Նպատակը Ռուսաստանի գյուղատնտեսական բանկի միջոցով իրականացվող ֆինանսական գործարքների համար խոչընդոտների վերացումն է, ինչը բազմիցս պնդել է Ռուսաստանի Դաշնությունը, ինչպես նաև թույլ տալ միաժամանակ շարունակել ուկրաինական հացահատիկի արտահանումը Սև ծովով»,- ասել է Դյուժարիկը՝ հավելելով, որ ռուսական կողմը ստացել է գլխավոր քարտուղարի նամակն ու այժմ ուսումնասիրում է այն։
Ըստ ՄԱԿ-ի գլխավոր քարտուղարի ներկայացուցչի՝ հուլիսի 17-ը կլինի վերջին օրը, որից հետո միջանցքը կդադարի աշխատել, եթե հացահատիկի գործարքը չերկարաձգվի։
