Գաղութում 100 օր շարունակ Նավալնիին ստիպում են լսել Պուտինի նույն ելույթը
Ռուս ընդդիմադիր գործիչ Ալեքսեյ Նավալնին, որը երկարաժամկետ բանտարկություն է կրում Վլադիմիրի շրջանի թիվ 6 ուղղիչ գաղութում, հարյուր օր անընդմեջ ամեն երեկո լսում է ՌԴ նախագահ Վլադիմիր Պուտինի նույն ելույթը՝ նախագահի փետրվարյան ուղերձը Դաշնային ժողովին։ Այս մասին ընդդիմադիրի անունից հաղորդագրություն է հայտնվել թելեգրամյան իր ալիքում:
Ըստ հաղորդագրության` Նավալնին դատարան է դիմել՝ պահանջելով բացատրել, թե ինչ հիմքով է ստիպված լսել Պուտինի ուղերձը, այլ ոչ թե ռադիո։ Դատարանում դա պատճառաբանվել է «դաստիարակչական աշխատանքի ցուցումներով»:
Նշենք, որ Ալեքսեյ Նավալնին խարդախության մեղադրանքով ինը տարվա պատիժ է կրում խիստ ռեժիմի գաղութում։ Ինքը, ռուս իրավապաշտպանները և միջազգային հանրությունը նրա հետապնդումը քաղաքական են համարում։
