ԼՈՒՍԱՆԿԱՐՆԵՐ․ Միաժամանակ հրդեհվել են Շիրակ գյուղի եկեղեցին ու մատուռը․ ԶԼՄ

Անհասկանալի պայմաններում, գրեթե միաժամանակ հունիսի 30-ին ժամը՝15:00-16:00-ի մոտակայքում հրդեհվել են Շիրակի մարզի Շիրակ գյուղում մատուռն ու կիսավեր սուրբ Մինաս եկեղեցու փակ տարածքը:

Շիրակի վարչական ղեկավար Համլետ Ասատրյանը Sputnik Արմենիային տեղեկացրեց՝ մատուռն այրվել է ամբողջությամբ՝ երկու մարտական հաշվարկ է մասնակցել հրդեհաշիջմանը, իսկ եկեղեցում բռնկված հրդեհը հնարավոր է եղել արագ հանգցնել:

«Գյուղի մի մասը տեղյակ էր, որ մատուռն է այրվում, մի մասն էլ գիտեր՝ սուրբ Մինասը: Մինչև մատուռի հրդեհով էի զբաղված՝ տեղեկացա եկեղեցու հրդեհի մասին: Վայրկյանների տարբերությամբ երկու սրբատեղի է այրվել․ տարօրինակ է»,- պատմել է Համլետ Ասատրյանը՝ հավելելով գյուղաբնակները տարակուսած են՝ ինչը կարող էր գյուղի տարբեր հատվածներում տեղակայված սրբատեղների հրդեհի պատճառ դառնալ։

Սուրբ Մինաս եկեղեցին 19-րդ դարի եկեղեցի է՝ կիսավեր։ Այրվել է մոմավառության համար հարմարեցված տարածքը։ Մատուռը կառուցվել էր 1920-ական թվականներին։

Լուսանկարները՝ Շիրակի վարչական ղեկավար Համլետ Ասատրյանի։

[56a266add6ab5ee1c2ff5c55289497ca.png]

[7dc25c06ad1a46d29aa9554e2f8c5521.png]