Քաղաքապետարանը վերցրել է ճանապարհաշինական ընկերության՝ երաշխիքով ապահովված 4 մլն եվրո գումարը

Քաղաքապետարանը վերցրել է ճանապարհաշինական ընկերության՝ երաշխիքով ապահովված 4 մլն եվրո գումարը։ Այս մասին ավագանու այսօրվա նիստում ասել է փոխքաղաքապետ Տիգրան Ավինյանը։ 

Նա անդրադարձել է Բաբաջանյան փողոցում իրականացվող ճանապարհաշինությանը, որի կապալառու ընկերությունը սննկացել է։

«Ցավոք սրտի, կապալառու իտալական ընկերությունը սնանկացել է, և մեզ դրա մասին տեղեկացրել են մի փոքր ուշացումով»,- ասել է Ավինյանը՝ հավելելով, որ որոշակի բանակցություններից հետո Երևան քաղաքն իրացրել է իր իրավունքն ու վերցրել է երաշխիքով ապահովված 4 մլն եվրոյի չափով գումարը։

«Այս պահին վերջնական փուլում է նոր կապալառու ընկերության հետ պայմանագրի կնքման գործընթացը։ Վստահեցնում եմ՝ այս գործընթացում պատկան մարմինների մեղավորությունը չկա։ Ուղղակի ընկերությունը սնանկացել է և չի կարողացել աշխատանքները շարունակել։ Մենք էլ իրացրել ենք մեր իրավունքներն ամբողջ ծավալով»,- նշել է փոխքաղաքապետը։