ԵԽԽՎ բանաձևը դարձել է Ադրբեջանի վրա ճնշում գործադրելու ևս մեկ գործիք. Ռուբինյան
Կարճաժամկետ հեռանկարում դժվար է ասել, թե Եվրոպայի խորհրդի խորհրդարանական վեհաժողովի (ԵԽԽՎ)՝ Լաչինի միջանցքի վերաբերյալ բանաձևն ինչ օգուտ կբերի։ Այս մասին ԵԽԽՎ–ում ՀՀ ԱԺ պատվիրակության մամուլի ասուլիսին նշել է ԱԺ փոխխոսնակ, արտաքին հարաբերությունների մշտական հանձնաժողովի նախագահ Ռուբեն Ռուբինյանը։
Նրա խոսքով` միջազգային կառույցների որոշումները պետք է դիտարկել միահյուսված, քանի որ ոչ մի առանձին բանաձևով հնարավոր չէ լուծել խնդիրը։
Ռուբինյանը համոզված է` ԵԽԽՎ–ում ընդունված փաստաթուղթը Բաքվի վրա ճնշում գործադրելու ևս մեկ լծակ է տվել։ ԱԺ փոխնախագահը նշեց, որ փաստաթղթի քննարկումների ժամանակ որոշ խորհրդարանականներ նույնիսկ հարց են տվել` արդյոք Ադրբեջանը կարող է այս ամենից հետո շարունակել անդամակցությունը ԵԽ–ին։
Հիշեցնենք, որ ԵԽԽՎ–ն հունիսի 22-ին քվեարկությամբ ընդունել է «Լաչինի միջանցքով ազատ ու անվտանգ մուտքի ապահովումը» բանաձևը, որում հստակ ասվում է, թե Լաչինի միջանցքով չկա ազատ և անվտանգ տեղաշարժ։
ԵԽ խորհրդարանական վեհաժողովը հունվարի 26-ին էլ ընդունել էր «Առաջընթացը Վեհաժողովի մոնիտորինգային գործընթացներում» (հունվար-դեկտեմբեր 2022թ․) բանաձևը։ Դրանում ներառվել էին հայկական պատվիրակության առաջարկած փոփոխությունները՝ Ադրբեջանի կողմից հայ ռազմագերիներին անհապաղ ազատ արձակելու և Լաչինի միջանցքի առնչությամբ Մարդու իրավունքների եվրոպական դատարանի միջանկյալ միջոցները կատարելու վերաբերյալ։
