Ուկրաինայում ռուսական միջուկային զենքի կիրառումը կդիտարկվի որպես հարձակում ՆԱՏՕ-ի վրա․ բանաձև՝ ԱՄՆ Սենատում
ԱՄՆ Սենատը բանաձև է պատրաստել, որն առաջարկում է Ռուսաստանի կամ Բելառուսի կողմից միջուկային պայթուցիկ սարքի ցանկացած օգտագործում Ուկրաինայի տարածքում դիտարկել որպես հարձակում ՆԱՏՕ-ի վրա, լրագրողներին ասել է հանրապետական սենատոր Լինդսի Գրեմը։
«Այսօր մենք բանաձև ենք ներկայացրել, որի իմաստն այն է, որ եթե Ռուսաստանը կամ Բելառուսը միջուկային սարք են պայթեցնում Ուկրաինայի տարածքում՝ հակահարձակումը կասեցնելու կամ ուկրաինացի ժողովրդի կամքը ճնշելու նպատակով, ապա նման հարձակումը պետք է դիտարկել որպես հարձակում ՆԱՏՕ-ի վրա»,- ասել է նա դեմոկրատ սենատոր Ռիչարդ Բլումենտալի հետ համատեղ մամուլի ասուլիսում։
Նրա խոսքով՝ Ռուսաստանը պետք է հաշվի առնի, որ Ուկրաինայում միջուկային զենքի կիրառումը կառաջացնի «զանգվածային պատասխան ՆԱՏՕ-ի կողմից, և նա կպատերազմի ՆԱՏՕ-ի հետ»։
Բանաձևն իր բնույթով խորհրդատվական է, եթե այն ընդունվի, Սպիտակ տունը պարտավոր չի լինի այն իրականացնել։
