ՏԵՍԱՆՅՈՒԹ․ Անհետացած սուզանավի անձնակազմի անդամներից մեկի կինը «Տիտանիկ»-ի հայտնի զույգի ծոռնուհին է
«Տիտանիկ» նավի խորտակման վայրը մեկնած, սակայն ճանապարհին անհետացած սուզանավի հինգ ուղևորներից մեկը՝ Սթոքթոն Ռաշը, «կապ ունի» 20-րդ դարի սկզբին Ատլանտյան օվկիանոսում տեղի ունեցած ողբերգական նավաբեկության զոհերից երկուսի հետ: Այս մասին գրում է New York Times-ը:
Կայքը մանրամասնել է, որ անհետացած տղամարդու կինը՝ Վենդի Ռաշը, 1912 թվականին նավաբեկության հետևանքով զոհվածներից երկուսի ծոռնուհին է:
Պարբերականը հայտնում է, որ տիկին Ռաշը գերմանաբնակ ամերիկացի ձեռներեց, Macy's հանրախանութների ամերիկյան խոշորագույն ցանցի համասեփականատեր Այսադոր Շտրաուսի և նրա կնոջ՝ Իդայի ծոռնուհին է։ Ենթադրվում է, որ զույգը եղել է «Տիտանիկ»-ի ամենահարուստ ուղևորներից:1912 թվականի ապրիլին Այսադոր Շտրաուսը կնոջ հետ որոշել է «Տիտանիկ»-ով մեկնել ԱՄՆ։ Այսբերգի հետ բախվելուց հետո նավը սկսել է խորտակվել։ Զույգին առաջարկել են նստել փրկարար նավակ, սակայն Շտրաուսը հրաժարվել է, քանի որ խորտակվող նավի վրա դեռ կանայք և երեխաներ են եղել։ Տղամարդը պնդել է, որ կինը նավակով հեռանա «Տիտանիկ»-ից, սակայն կինը որոշել է մնալ ամուսնու հետ։ Իրենց փոխարեն Շտրաուսները նավակի մեջ նստացրել են իրենց սպասուհուն։ «Տիտանիկ»-ի կործանման հետևանքով Այսադոր և Իդա Շտրաուսները մահացել են։
Նշվում է, որ ամուսնական զույգի պատմությունն արտացոլվել է Ջեյմս Քեմերոնի 1997 թվականին նկարահանված «Տիտանիկ» օսկարակիր ֆիլմում։ Սակայն այն տեսարանը, որտեղ Շտրաուսը փորձում է համոզել կնոջը նստել նավակը, հանվել է ֆիլմի վերջնական տարբերակից։
Ուենդի Ռաշի LinkedIn-ի էջում ասվում է, որ վերջին երկու տարվա ընթացքում նա մասնակցել է երեք արշավի դեպի «Տիտանիկ»-ի խորտակման նավը: Արշավները կազմակերպել է OceanGate ընկերությունը, որը հիմնադրել է իր ամուսինը՝ Սթոքթոն Ռաշը:
Հիշեցնենք՝ ավելի վաղ հայտնել էինք, որ Ատլանտյան օվկիանոսում կորել է «Տիտանիկ»-ն ուսումնասիրող բաթիսկաֆը։ Այսօր՝ հունիսի 22-ին «Տիտան» սուզանավում թթվածինը մի քանի ժամից կսպառվի, թիմի հինգ անդամի գոյատևման հնարավորությունը չնչին է։
