Սելավը լցվել է գոմեր ու տասնյակ գառների խեղդել․ Շամբի բնակիչ
Սյունիքի մարզի Շամբ վարչական շրջանում երկու օր շարունակ տեղացած կարկուտը ոչնչացրել է գրեթե ամբողջ բերքը։ Այս մասին NEWS.am-ի հետ զրույցում ասել է բնակիչ Սաշա Ստեփանյանը։
«Ամբողջությամբ վնասվել են բանջարաբոստանային կուլտուրաները, հացահատիկը, միրգը, ջերմոցային տնտեսությունները։ Գյուղացին, ինչ արել է ամբողջ տարվա ընթացքում, փչացել է։ Ձվից մեծ կարկուտներ էին։ Իմ մշակած բերքից մեկ օրինակ չի մնացել»,- ասել է նա։
Ստեփանյանի խոսքով՝ վնասվել են ոչ միայն մրգերը եւ բանջարեղեններն, այլեւ գույքը եւ կենդանիները։
«Սելավը լցվել է գոմեր, տասնյակ գառներ խեղդվել են, նաեւ տուն է մտել սելավը։ Տանիքները ծակել է, ավտոմեքենաների ապակիները ջարդել է, արեւային կայանները ջարդել է, ասֆալտապատված ճանապարհները քանդել է եւ հեղեղի վերածել։ Գյուղում չկա մարդը, որն ինչ-որ վնաս չի կրել։ Մեր պատմության մեջ նման մասշտաբի կարկուտ չէր եղել»,- նշել է բնակիչը։
Նշվում է, որ գյուղում վնասների գնահատման աշխատանքներ են իրականցում։ Գյուղում հակակարկտային կայաններ չեն գործում, գրեթե բոլոր գյուղացիներն էլ ապահովագրություն չունեն։
«Լսել ենք՝ Քերոբյանն ասել է՝ փոխհատուցում չեն ստանա գյուղացիները, որոնք ապահովագրություն չունեն, բայց այդպես ո՞նց կլինի։ Եթե գյուղացուն չօգնեն, այս տարի մեզ մոտ ապրելն անհնարին է լինելու, որովհետեւ մարդիկ միլինանոց վարկեր էին վերցրել, որ բերք մշակեին։ Գյուղացի կա գուցե չի լսել կամ չի հասկանում՝ ինչ անել, պետությունն ինչպե՞ս չօգնի գյուղացուն»,- ընդգծել է Ստեփանյանը։
