Սա հայ–ռուսական հարաբերությունների դեմ է. Ռոբերտ Ղուկասյանը` Ադրբեջանի սադրանքի մասին

Կապանի մոտ գտնվող հայկական դիրքերի գնդակոծումն ուղղված է հայ–ռուսական հարաբերություններին։ ՌԴ պատվիրակության հետ հանդիպման ժամանակ այս հայտարարությունն արել է Սյունիքի մարզպետ Ռոբերտ Ղուկասյանը, տեղեկանում ենք Sputnik Հայաստան-ից։

«Երեկ ադրբեջանական ԱԹՍ–ները կրակ էին բացել Կապանի մոտակայքում գտնվող հայկական դիրքերի ուղղությամբ։ Կարծում եմ` սա նպատակաուղղված է հայ–ռուսական հարաբերությունների, Ռուսաստանի դեմ, որովհետև միայն այն փաստը, որ նման մեծ պատվիրակություն է այս պահին տարածաշրջանում` այս քաղաքում, նրանք պետք է հասկանային և նման բան թույլ չտային»,– նշել է մարզպետը։

Նա հավելել է, որ իրենք շատ լավ գիտակցում են այս ամենի նպատակը` թույլ չտալ, որ Հայաստանի և Ռուսաստանի միջև սերտ կապեր լինեն։

Մարզպետը շեշտել է, որ, բարեբախտաբար, զոհեր չունենք, միայն մեկ զինծառայող է վիրավորվել Տեղի մոտ։ Ըստ նրա` այս պահին իրավիճակը հանդարտվել է։ 

«Նրանք ցանկանում էին հարված հասցնել մեր հարաբերություններին։ Բայց դուք լավ գիտեք Սյունիքը և գիտեք, թե այստեղ մարդիկ ինչպես են վերաբերվում Ռուսաստանի Դաշնությանը, կարևորում այս կապերի պահպանումը»,– ռուս բարձրաստիճան պաշտոնյաների հետ զրույցում ասել է մարզպետը։

Ղուկասյանը հավելել է, որ հայ–ռուսական հարաբերությունները պետք է ամենաբարձր մակարդակի վրա լինեն։ Խոստացավ` անելու են ամեն բան, ինչ իրենցից է կախված, որ ապագա սերունդներն անգամ ավելի սերտ հարաբերություններ ունենան, քան այսօր։