ԼՈՒՍԱՆԿԱՐՆԵՐ․ Ադրբեջանցիների հերթական մշակութային վանդալիզմը․ ավերել են Հալիվորի կամուրջը
Ադրբեջանցիները ավերել են Հալիվորի կամուրջը։ Այս մասին տեղեկանում ենք «Կովկասի ժառանգության մշտադիտարկում» (“Caucasus Heritage Watch”) կայքի հրապարակած տիեզերական լուսանկարներից, որտեղ երևում է, որ ադրբեջանցիները ավերել են Հալիվորի կամուրջը։
Այս մասին գրել է Արցախի Հանրապետության Պատմական միջավայրի պահպանության պետական ծառայությունը և տեղեկություն ներկայացրել Հալիվորի կամուրջի մասին.
«Հալիվորի կամ Հալևորի կամուրջը գտնվում է Հադրութի շրջանի Մեծ Թաղեր գյուղից 2կմ հարավ-արևմուտք` Իշխանագետի վրա: Համաձայն կամրջի հոսքընթաց ճակատին ագուցված քարի վրա փորագրված և ցարդ պահպանված շինարարական 7 տողանի արձանագրության` կառուցվել է 1835թ.:
Այն Իշխանագետի և նրա վտակների վրա կառուցված 6 կամուրջներից մեկն է, որոնցից չորսն անխափան պահպանվում են և գործում:
Հալիվորի կամուրջն ասես Իշխանագետի կանաչ գոտին լինի: Իրականում այդ գոտին Մեծ Թաղերի տարածքը գետի վրայով կապում է Տումի գյուղի տարածության հետ: Միակամար, կիսագլանաձև թաղով ծածկված կամուրջն իրար է կապել ժայռոտ ձորափերը: Այն ունի 20 մետր երկարություն, 3 մետր լայնություն և 9 մետր բարձրություն: Կամարային բացվածքի լայնությունը կազմում է 9 մետր»։
