Մանե Թանդիլյանը՝ Երևանի քաղաքապետի թեկնածու
«Ապրելու երկիր» կուսակցությունը քաղաքական խորհրդի նիստում հաստատել է Երևանի ավագանու առաջիկա ընտրություններում քաղաքապետի պաշտոնի համար կուսակցության թեկնածուին՝ Մանե Թանդիլյանին: Այս մասին հայտարարել է կուսակցության քաղաքական խորհրդի անդամ Տիգրան Սահակյանը նիստից հետո հրավիրված ասուլիսի ժամանակ:
Ըստ նրա՝ որոշումը հիմնված է եղել վերջին ամիսներին Երևանի բնակիչների հետ իրենց ակտիվ շփումների, սոցիոլոգիական հարցումների, ինչպես նաև կուսակցության անդամների կարծիքների հիման վրա: Սահակյանը հայտնել է, որ հավատարիմ են իրեն որդեգրած դիրքորոշմանը՝ համապետական ընտրություններից զատ՝ ակտիվորեն պատրաստվել և մասնակցել բոլոր ՏԻՄ ընտրություններին:
«Մենք վստահ ենք, որ ՏԻՄ մակարդակում ևս քաղաքական ուժերը պետք է լուրջ քաղաքական ծրագրեր ներկայացնեն, ստանձնեն պատասխանատվություն և, ընթացիկ օպերատիվ խնդիրներից զատ, իրական զարգացում ապահովեն համայնքներում»,- ասել է Սահակյանը:
Նրա խոսքով՝ Մանե Թանդիլյանի առաջադրումը ևս մեկ անգամ ընդգծում է իրենց վճռականությունը ոչ միայն մասնակցելու, այլև հաղթելու Երևանի ավագանու ընտրություններում:
«Ես հավաստիացնում եմ, որ այս ընտրություններում մեր մասնակցությունն ու հաղթանակը երկրում արմատական ու խորքային փոփոխությունների առաջնորդության անշրջելի հայտ է մեր կողմից»,- նշել է նա:
Երևանի ավագանու ընտրությունները նախատեսվում է անցկացնել սեպտեմբերին:
